തിരുവനന്തപുരം:സംവരണമില്ലാത്ത സമുദായങ്ങളിലെ സാമ്പത്തികമായി പിന്നാക്കം നിൽക്കുന്നവർക്ക് ദേവസ്വംബോർഡുകളിൽ 10 ശതമാനം സംവരണം നിലവിൽ വന്നതായി ദേവസ്വം റിക്രൂട്ട്മെന്റ് ബോർഡ് ചെയർമാൻ അഡ്വ.എം.രാജഗോപാലൻ നായർ വാർത്താ സമ്മേളനത്തിൽ അറിയിച്ചു.

തിരുവിതാംകൂർ ദേവസ്വം ബോർഡിലെ എൽ.ഡി.ക്ളർക്ക് /സബ്ഗ്രൂപ്പ് ഓഫീസർ ഗ്രേഡ്-2 തസ്തികകളിലേക്ക് സംവരണം പാലിച്ചു തയ്യാറാക്കിയ സാദ്ധ്യതാ പട്ടിക ഇന്ന് പ്രസിദ്ധീകരിക്കും. അഭിമുഖ പരീക്ഷ ഒഴിവാക്കി, ഒ.എം.ആർ പരീക്ഷയുടെ മാർക്കിന്റെ മാത്രം അടിസ്ഥാനത്തിലാണ് പട്ടിക തയ്യാറാക്കിയത്. ഏതെങ്കിലും വിധത്തിലുള്ള ആക്ഷേപങ്ങൾ ഉണ്ടാവാതിരിക്കാനാണിതെന്നും അദ്ദേഹം വ്യക്തമാക്കി. 68:32 ആയിരുന്നു ബോർഡിൽ നിലവിലെ സംവരണക്രമം. ജനറൽ വിഭാഗത്തിലെ 68 ശതമാനത്തിൽ നിന്ന് 10 ശതമാനം മുന്നാക്കവിഭാഗത്തിലെ സാമ്പത്തികമായി പിന്നാക്കം നിൽക്കുന്നവർക്ക് നൽകും. ഈഴവ സമുദായത്തിന് മൂന്നും പട്ടികജാതി/ പട്ടിക വർഗ്ഗ വിഭാഗത്തിന് രണ്ടും മറ്റ് പിന്നാക്കക്കാർക്ക് മൂന്നും ശതമാനം അധികസംവരണം നൽകും.ഇതോടെ, സംവരണം 50:50 ആയി മാറും

മുന്നാക്ക വിഭാഗക്കാരുടെ സാമ്പത്തിക പിന്നാക്കാവസ്ഥ നിശ്ചയിക്കാൻ ദേവസ്വം ബോർഡുകളും റിക്രൂട്ട്മെന്റ് ബോർഡും കൂടിയാലോചിച്ച് മാനദണ്ഡങ്ങൾ നിശ്ചയിച്ചിട്ടുണ്ട്. എൽ.ഡി.ക്ളാർക്ക് /സബ് ഗ്രൂപ്പ് ഓഫീസർ ഗ്രേഡ്-2 തസ്തികയിലേക്ക് അപേക്ഷിച്ച 1,43,587 പേരിൽ 85,173 പേർ പരീക്ഷ എഴുതി.100 മാർക്കിനായിരുന്നു പരീക്ഷ.183 പേരെ പ്രധാന ലിസ്റ്രിലും 173 പേരെ ഉപലിസ്റ്റിലും ഉൾപ്പെടുത്തിയിട്ടുണ്ട്.ജാതി/ക്രിമിലെയർ, സാമ്പത്തിക സർട്ടിഫിക്കറ്റുകൾ പരിശോധിച്ച് അർഹരെ ഉൾപ്പെടുത്തി അന്തിമലിസ്റ്റ് പ്രസിദ്ധീകരിക്കും.വില്ലേജ് ഓഫീസറുടെ സർട്ടിഫിക്കറ്റാണ് നൽകേണ്ടത്.

. 2014-ൽ ദേവസ്വം റിക്രൂട്ട്മെന്റ് ബോർഡ് നിലവിൽ വന്നപ്പോൾ 32 ശതമാനം സാമുദായിക സംവരണം മാത്രമാണ് ചട്ടത്തിൽ ഉൾക്കൊള്ളിച്ചിരുന്നത്. നിലവിലെ റിക്രൂട്ട്മെന്റ് ബോർഡ് നൽകിയ ശുപാർശയുടെ അടിസ്ഥാനത്തിൽ 2017 നവംബർ 15 ന് കൂടിയ മന്ത്രിസഭായോഗം സാമ്പത്തിക സംവരണത്തിന് അംഗീകാരം നൽകി. ഏറെ നിയമ, സാങ്കേതിക തടസങ്ങൾ മറികടന്നാണ് സാമ്പത്തിക സംവരണം സാദ്ധ്യമാക്കിയത്. ഈ ബോർഡ് 20 തസ്തികകളിൽ വിജ്ഞാപനം പുറപ്പെടുവിച്ചു.19 തസ്തികകളുടെ തിരഞ്ഞെടുപ്പ് നടപടികൾ പൂർത്തിയായി. തിരുവിതാംകൂർ, കൊച്ചിൻ, മലബാർ ദേവസ്വം ബോർഡുകളിലേക്കും ദേവസ്വം റിക്രൂട്ട്മെന്റ് ബോർഡിലേക്കുമായി 1748 പേരുടെ റാങ്ക് ലിസ്റ്ര് പ്രസിദ്ധീകരിച്ചു. 631 പേരെ നിയമനത്തിനായി ശുപാർശ ചെയ്തു. ലാ ഓഫീസർ തസ്തികയിലേക്കുള്ള എഴുത്തു പരീക്ഷ നവംബർ 3 ന് നടക്കുമെന്നും രാജഗോപാലൻ നായർ പറഞ്ഞു.ബോർഡ് അംഗങ്ങളായ ജി.എസ്.ഷൈലാമണി, പി.സി.രവീന്ദ്രനാഥൻ,സെക്രട്ടറി ആർ.ഉണ്ണികൃഷ്ണൻ എന്നിവരും വാർത്താസമ്മേളനത്തിൽ പങ്കെടുത്തു.

സാമ്പത്തിക സംവരണം:

മാനദണ്ഡങ്ങൾ

 വാർഷിക കുടുംബ വരുമാനം പ്രതിവർഷം മൂന്ന് ലക്ഷം രൂപയിൽ താഴെ.

 ആദായനികുതി നൽകുന്നവരുൾപ്പെടുന്ന കുടുംബമാവരുത്.

 ഒരേക്കറിൽ താഴെ വസ്തു

 സർക്കാർ ഉദ്യോഗസ്ഥൻ അംഗമാവരുത്.

കുടുംബത്തിന്റെ

നിർവചനം

അപേക്ഷകൻ/ അപേക്ഷക

അപേക്ഷകന്റെ മാതാവ്, പിതാവ്

 അപേക്ഷകന്റെ ഭാര്യ/ഭർത്താവ്

 18 വയസിൽ താഴെയുള്ള മക്കൾ

ദേവസ്വംബോർഡിലെ

പുതിയ സംവരണ ക്രമം

മുന്നാക്ക വിഭാഗങ്ങളിലെ സാമ്പത്തികമായി

പിന്നാക്കം നിൽക്കുന്നവർ.- 10 %

ഈഴവ സമുദായം -.17 % (14+3)

 പട്ടികജാതി/പട്ടികവർഗ്ഗം -.12 % (10+2)

 മറ്റ് പിന്നാക്ക വിഭാഗം. . -6 % (3+3)

വിശ്വകർമ്മവിഭാഗം . -3%

 ധീവര -1 %

 ഹിന്ദു നാടാർ -1 %