മാവേലിക്കര: ചെട്ടികുളങ്ങര ദേവീക്ഷേത്രത്തിൽ അശ്വതി ഉത്സവം ചുവർചിത്ര ശൈലിയിൽ ചിത്രീകരിച്ചതിന്റെ മിഴി തുറക്കൽ ചടങ്ങ് ഇന്ന് നടക്കും. രാവിലെ 9.20നും 9.44നും മദ്ധ്യേയാണ് ചടങ്ങ് നടക്കുന്നത്. ക്ഷേത്രത്തിന്റെ വടക്കേ നടയിൽ ബാലകന്റെ ക്ഷേത്രത്തോട് ചേർന്ന് ക്ഷേത്രക്കിണറിന്റെ ചുവരിലാണ് അശ്വതി ഉത്സവം ചുവർചിത്രങ്ങളായി പരിണമിച്ചത്.

അക്രിലിക് കളർ ഉപയോഗിച്ചായിരുന്നു രചന. അശ്വതി ഉത്സവത്തിന്റെ കെട്ടുകാഴ്ചകൾ, ഘണ്ഠാകർണന്റെ പ്രതീകമായ പോള വിളക്കുകൾ, തീവെട്ടി, താളമേളങ്ങൾ, ആപ്പിണ്ടി എന്നിവയും ചെട്ടികുളങ്ങരയമ്മയുടെ കൊടുങ്ങല്ലൂരിലേക്കുള്ള യാത്രയയപ്പുമാണ് ചിത്രീകരിച്ചിട്ടുള്ളത്. രണ്ടാഴ്ചയെടുത്തായിരുന്നു ചിത്രീകരണം. ക്ഷേത്രത്തിനകത്തെ ഭിത്തിയിൽ ക്ഷേത്ര ഐതിഹ്യം ചുവർ ചിത്രമായി വരച്ചത് ചെട്ടികുളങ്ങര ഈരേഴ തെക്ക് ചാലേത്ത് തെക്കതിൽ എസ്.ശ്യാമിന്റെ നേതൃത്യത്തിലാണ്. പത്തനംതിട്ട വാരിയാപുരം മനോജ് മേലൂട്ട്, ആറന്മുള വാസ്തുവിദ്യാഗുരുകുലം വിദ്യാർത്ഥികളായ പത്തനംതിട്ട പെരുനാട് സ്വദേശി ദീപ്തി.കെ.രാജൻ, കായംകുളം കൃഷ്ണപുരം സ്വദേശിനി ഡയാനാ സുനിൽ, കോട്ടാത്തല സ്വദേശിനി ആശാ മനോജ് എന്നിവർ ചേർന്നാണ് ചിത്രരചന പൂർത്തീകരിച്ചത്.