ചേർത്തല: ബസ് യാത്രയ്ക്കിടെ വയോധികയുടെ രണ്ടര പവൻ മാല മോഷ്ടിച്ച തമിഴ്നാട് സ്വദേശിയായ യുവതി പൊലീസ് പിടിയിൽ. വൈക്കം അംബികാമാർക്ക​റ്റ് കുന്നത്തിൽ കോളനി രാമകൃഷ്ണന്റെ ഭാര്യ പത്മിനിയുടെ (63) മാല അപഹരിച്ച കേസിൽ കാളിയമ്മയാണ് (32) പിടിയിലായത്.

ഇന്നലെ രാവിലെ 11 ഓടെ ചേർത്തല മുനിസിപ്പൽ ബസ് സ്​റ്റാൻഡിലാണ് സംഭവം. കോട്ടയത്തുനിന്നു ചേർത്തലയിലേക്കുള്ള ബസിലായിരുന്നു പത്മിനിയും കാളിയമ്മയും യാത്ര ചെയ്തിരുന്നത്. ചേർത്തല സ്​റ്റാൻഡിലെത്തി ബസിൽ നിന്ന് ഇറങ്ങുന്നതിനിടെ മാല നഷ്ടപ്പെട്ട വിവരം മനസിലാക്കിയ പത്മിനി ബഹളം വച്ചതോടെ മ​റ്റ് യാത്രക്കാരും ബസ് ജീവനക്കാരും ചേർന്ന്, സംശയം തോന്നിയ കാളിയമ്മയെ തടഞ്ഞുവയ്ക്കുകയും പൊലീസിനെ അറിയിക്കുകയുമായിരുന്നു. പൊലീസ് നടത്തിയ പരിശോധനയിൽ ഇവരിൽ നിന്നു മാല കണ്ടെടുത്തു. കോടതിയിൽ ഹാജരാക്കിയ കാളിയമ്മയെ റിമാൻഡ് ചെയ്തു.