ചേർത്തല: വൃക്കകൾ തകരാറിലായ വയലാർ പഞ്ചായത്ത് ഏഴാം വാർഡ് ചിറയിൽപ്പറമ്പിൽ സ്വാതിഷയുടെ ചികിത്സാ സഹായത്തിനായി 'മലയാളീസ്' സ്വകാര്യബസ് ജീവനക്കാർ നടത്തിയ കാരുണ്യയാത്രയിൽ നിന്നു പിരിഞ്ഞു കിട്ടിയത് 20,300 രൂപ. തുക വാർഡംഗം യു.ജി. ഉണ്ണിയുടെ സാന്നിദ്ധ്യത്തിൽ സ്വാതിഷയ്ക്ക് കൈമാറി. ചേർത്തല- എറണാകുളം റൂട്ടിൽ സർവീസ് നടത്തുന്ന ബസാണ് മലയാളീസ്.

22 പേരടങ്ങുന്ന ട്രസ്റ്റാണ് സർവീസ് നിയന്ത്രിക്കുന്നത്. സ്വാതിഷയുടെ വിവരം മാദ്ധ്യമങ്ങളിലൂടെ അറിഞ്ഞതിനെ തുടർന്നാണ് സഹായമേകാൻ കാരുണ്യ യാത്ര തീരുമാനിച്ചതെന്ന് ട്രസ്​റ്റ് പ്രസിഡന്റ് കെ.എസ്. ബിനു, സെക്രട്ടറി പി.ഐ.സൈജൻ എന്നിവർ പറഞ്ഞു. ടിക്കറ്റ് ഒഴിവാക്കി ബക്കറ്റിൽ സഹായങ്ങൾ സ്വീകരിക്കുകയായിരുന്നു. ജീവനക്കാർ ശമ്പളം ഉപേക്ഷിച്ചാണ് ഇന്നലെ ജോലി ചെയ്തത്. സർവീസിന് ഡ്രൈവർ ഷാൻ,ട്രസ്​റ്റ് അംഗങ്ങളായ എസ്.ശ്രീരാജ്,ടി.പി.വിജീഷ്,പി.എം.സലിംജി, പി.ജെ.ഷെമീർ,കെ.ജെ. ഷിബു,സിബി തോമസ്, എസ്.രതീഷ്,എസ്. അരുൺമുത്ത്, കെ.എസ്.ശ്രീജിത്ത് എന്നിവർ നേതൃത്വം നൽകി. ദിനീഷിന്റെ ഭാര്യയാണ് സ്വാതിഷ. അമ്മ ഉഷ സോമൻ വൃക്ക നൽകുമെങ്കിലും ശസ്ത്രക്രിയ ഉൾപ്പെടെയുള്ള ചെലവുകൾക്കാണ് പണം വേണ്ടിത്.