ന്യൂഡൽഹി: മദ്രാസ്​ ഐ.ഐ.ടിയിലെ മലയാളി വിദ്യാർത്ഥി ഫാത്തിമ ലത്തീഫിന്റെ ദുരൂഹ മരണം ഇന്നലെ പാർലമെന്റിൽ ഉന്നയിച്ച എൻ.കെ. പ്രേമചന്ദ്രൻ കുറ്റക്കാർക്കെതിരെ അടിയന്തര നടപടി ആവശ്യപ്പെട്ടു. അന്വേഷണ റിപ്പോർട്ട്​ കിട്ടിയാൽ നടപടിയെടുക്കുമെന്ന്​ മാനവ വിഭവശേഷി മന്ത്രി രമേഷ് പൊക്രിയാൽ മറുപടി നൽകി.

അടിയന്തര പ്രമേയത്തിന്​ അനുമതി കിട്ടാത്തതിനെ തുടർന്ന് പ്രേമചന്ദ്രൻ ശൂന്യവേളയിൽ സബ്​മിഷനായി വിഷയം ഉന്നയിക്കുകയായിരുന്നു. കൊടിക്കുന്നിൽ സുരേഷും ഡി.എം.കെ നേതാവ് കനിമൊഴിയും പിന്തുണച്ച് സംസാരിച്ചു.

കഴിഞ്ഞ വർഷം ഒരു അദ്ധ്യാപകനും നാല്​ വിദ്യാർത്ഥികളും മദ്രാസ്​ ​ഐ.ഐ.ടിയിൽ ദുരൂഹ സാഹചര്യത്തിൽ മരിച്ചിരുന്നു. മതപരമായ വിവേചനവും അധിക്ഷേപവും ഉൾപ്പെടെ നേരിടേണ്ടി വന്നതാണ്​ ഫാത്തിമയുടെ മരണത്തിന് കാരണമെന്ന് ആരോപണമുണ്ടെന്ന് പ്രേമചന്ദ്രൻ പറഞ്ഞു. ​

സത്പേരിന്​ കളങ്കമുണ്ടാക്കിയെന്ന്​ ആരോപിച്ച്​ മ​ദ്രാസ്​ ഐ.ഐ.ടി അധികൃതർ ഫാത്തിമ ലത്തീഫിന്റെ പിതാവിനെതിരെ പരാതി നൽകിയെന്ന് വാർത്തയുണ്ട്​. ഇത് നിർഭാഗ്യകരമാണ്​​. ഫാത്തിമയുടെ മരണവുമായി ബന്ധപ്പെട്ട്​ ഉന്നതതല അന്വേഷണം നടത്തണമെന്നും​ പ്രേമചന്ദ്രൻ ആവശ്യപ്പെട്ടു.

വിവിധ ഐ.ഐ.ടികളിൽ കഴിഞ്ഞ 10 വർഷത്തിനിടെ 52 വിദ്യാർത്ഥികൾ ആത്മഹത്യ ചെയ്​തിട്ടുണ്ടെന്ന്​ തുടർന്ന്​ സംസാരിച്ച തൂത്തുക്കുടി എം.പി കനിമൊഴി പറഞ്ഞു. ഉന്നത വിദ്യാഭ്യാസ സ്ഥാപനങ്ങളിലെ ജാതി വിവേചനവുമായി ബന്ധ​പ്പെട്ട്​ 72 കേസുകൾ രജിസ്​റ്റർ ചെയ്തിട്ടുണ്ട്​. ഇത്​ ലജ്ജാകരമാണ്.

അതിനിടെ, ഫാത്തിമയുടെ മരണം ലോക്സഭ നിറുത്തിവച്ച് ചർച്ച ചെയ്യണമെന്നാവശ്യപ്പെട്ട് പി.കെ. കുഞ്ഞാലിക്കുട്ടി ഇന്നലെ നോട്ടീസ് നൽകി. കുറ്റക്കാർക്കെതിരെ നടപടിയെടുക്കണമെന്ന് ഡൽഹിയിൽ ചേർന്ന മുസ്ലിംലീഗ് ദേശീയ കമ്മിറ്റിയും ആവശ്യപ്പെട്ടു.