ന്യൂഡൽഹി: വിവിധ കേസുകളിൽ തടവുശിക്ഷ അനുഭവിക്കുന്ന മൂന്ന് മലയാളികൾ ഉൾപ്പെടെ 26 ഇന്ത്യക്കാർക്ക് ഒമാൻ പൊതുമാപ്പ് നൽകി. വിദേശകാര്യ മന്ത്രാലയം ഇടപെട്ടതിനെ തുടർന്ന് ഒമാന്റെ ദേശീയ ദിനാഘോഷങ്ങളുടെ ഭാഗമായി ഇന്ത്യൻ തടവുകാർക്ക് പൊതുമാപ്പു നൽകണമെന്ന് കേന്ദ്ര വിദേശകാര്യ മന്ത്രാലയം ആവശ്യപ്പെട്ടതിനെ തുടർന്നാണ് നടപടിയെന്ന് വിദേശകാര്യ സഹമന്ത്രി വി. മുരളീധരൻ അറിയിച്ചു.

തിരുവനന്തപുരം സ്വദേശി ഷിജു ഭുവനചന്ദ്രൻ,​ മലപ്പുറം സ്വദേശി കിനാത്തെരിപറമ്പിൽ രമേശൻ,​ വടക്കാഞ്ചേരി സ്വദേശി പ്രേംനാഥ് പ്രീതേഷ് കറുപ്പത്ത് എന്നിവരാണ് മോചിതരാകുന്ന മലയാളികൾ. രമേശനും പ്രേംനാഥിനും ഒരു വർഷം തടവും കൊലക്കേസിൽ പ്രതിയായ ഷിജുവിന് 10 വർഷം തടവ് ശിക്ഷയുമാണ് ലഭിച്ചത്. കർണ്ണാടക,​ ആന്ധ്രപ്രദേശ്,​ തെലങ്കാന,​ രാജസ്ഥാൻ,​ മഹാരാഷ്ട്ര,​ ഉത്തർപ്രദേശ്,​ ഡൽഹി സ്വദേശികളാണ് മറ്റുള്ളവർ.