കൊച്ചി : പ്രളയ ദുരിതാശ്വാസത്തിനുമുള്ള അന്തിമ അദാലത്തിൽ അപേക്ഷ നൽകാൻ കലൂരിലെ സ്ഥിരം അദാലത്ത് ഓഫീസിൽ ആയി​രക്കണക്കി​ന് ദുരി​തബാധി​തർ എത്തി​.കഴി​ഞ്ഞവർഷത്തെ പ്രളയത്തി​ന് നഷ്ട പരി​ഹാരംതേടുന്ന അപേക്ഷകൾ ഒരാഴ്ചയായി സ്വീകരിച്ച് ടോക്കൺ​ നൽകുന്നുണ്ട്. ഇന്നലെ ലഭി​ച്ച അപേക്ഷകൾ അടുത്ത മാർച്ചിൽപരി​ഗണി​ക്കും. 40,000അപേക്ഷകൾ പ്രതീക്ഷിക്കുന്നു. ആദ്യ സിറ്റിംഗ് ഈമാസം 25 ന് നടക്കും.
ജില്ലാ കളക്ടർ അദ്ധ്യക്ഷനായ ജില്ലാ ദുരന്തനിവാരണ അതോറിറ്റി നടത്തിയ ഒന്നാംഘട്ട അദാലത്തിലെ ഉത്തരവുകളിൽ ആക്ഷേപമുള്ളവരാണ് അപ്പീൽ അപേക്ഷ നൽകുന്നത്. എറണാകുളത്തും പറവൂരുമാണ് അപേക്ഷകൾ സ്വീകരിക്കുന്നത്. ഇതുവരെ പതി​നായി​രത്തി​ലേറെ അപേക്ഷകൾ സ്വീകരിച്ചു .
ഞായറാഴ്ചയും പൊതു അവധി ദിവസങ്ങളും ഒഴികെയുള്ള പ്രവൃത്തി ദിവസങ്ങളിലാണ് അദാലത്ത് നടക്കുക.ഒരു ജഡ്ജിയും രണ്ട് ഉദ്യോഗസ്ഥരും അടങ്ങിയ സമിതിയാണ് അപേക്ഷകൾ പരിശോധിക്കുന്നത്. ദിവസം 70 അപേക്ഷകൾ മാത്രമേ പരിഗണിക്കുകയുള്ളു. മാർച്ചിൽ സാമ്പത്തിക വർഷം അവസാനിക്കുന്നതിനാൽ നഷ്ടപരിഹാര തുക വൈകുമെന്ന ആശങ്കയുമുണ്ട് .