പറവൂർ : പ്ലാസ്റ്റിക്ക് മാലിന്യശേഖരണവും സംസ്കരണ രീതികളും നേരിട്ട് മനസ്സിലാക്കാൻ മേഘാലയ ചീഫ് സെക്രട്ടറി പി.എസ്. തംഗ്ഹ്യൂവിന്റെ നേതൃത്വത്തിലുള്ള സംഘം ചേന്ദമംഗലം ഗ്രാമപഞ്ചായത്തിലെത്തി. ഹരിതകർമ്മ സേനയുടെ വീടുകളിൽ നിന്നുള്ള ശേഖരണരീതി, മാലിന്യങ്ങൾ തരംതിരിച്ച് ഷ്റെഡിംഗ് യൂണിറ്റിലെത്തിയ ശേഷം സെയിലിംഗ് ചെയ്യുന്ന രീതിയും ഗ്രീൻ ടെക്നീഷ്യൻമാർ വിശദീകരിച്ചു. ഷ്റെഡിംഗ് യൂണിറ്റിൽ നിന്നും നാല് ടണ്ണോളം പ്ലാസ്റ്റിക്ക് തരം തിരിച്ച് ക്ലീൻ കേരള കമ്പനിക്ക് ഇതുവരെ കൈമാറിയിട്ടുണ്ട്.

പഞ്ചായത്തിന്റെ ഈ രംഗത്തുള്ള പ്രവർത്തനങ്ങൾ മാതൃകാപരമെന്നും വിശദമായ പഠനത്തിന് മേഘാലയയിൽ നിന്ന് ഒരു ടീം പഞ്ചായത്ത് സന്ദർശിക്കുമെന്നും പി.എസ്. തംഗ്ഹ്യൂ പറഞ്ഞു. ശുചിത്വമിഷൻ ജില്ല കോർഡിനേറ്റർ എം.എച്ച്. ഷൈൻ, ജില്ലാ റിസോഴ്സ് പേഴ്സൺ എം.കെ. മോഹനൻ, ഗ്രാമ പഞ്ചായത്ത് പ്രസിഡന്റ് ടി.ഡി. അനൂപ്, വൈസ് പ്രസിഡന്റ് നിതാ സ്റ്റാലിൻ, ബ്ലോക്ക് പഞ്ചായത്തം ടി.ഡി. സുധീർ തുടങ്ങിയവർ ചീഫ് സെക്രട്ടറിക്കൊപ്പമുണ്ടായിരുന്നു.