തൃക്കാക്കര: റവന്യൂ വകുപ്പുമായി ബന്ധപ്പെട്ട പരാതികൾ പരിഹരിക്കുന്നതിന് ജില്ലാതല അദാലത്തിന് കണയന്നൂർ താലൂക്കിൽ തുടക്കമാകും. അടുത്തമാസം 21ന് നടക്കുന്ന അദാലത്തിലേക്ക് പരാതികൾ സമർപ്പിക്കുന്നതിനുള്ള അവസാന തീയതി അടുത്ത മാസം 5 നാണ്. കണയന്നൂർ താലൂക്ക് പരിധിയിൽ വരുന്ന റവന്യൂ വകുപ്പുമായി ബന്ധപ്പെട്ട സി.എം.ഡി.ആർ.എഫ്, സർവെ, പട്ടയം, വിവിധ സർട്ടിഫിക്കറ്റുകൾ തുടങ്ങിയ വിഷയങ്ങളിൽ പൊതുജനങ്ങൾക്ക് അപേക്ഷകളും പരാതികളും സമർപ്പിക്കാം. പ്രളയ സംബന്ധമായ പരാതികൾ അദാലത്തിൽ പരിഗണിക്കുന്നതല്ല.അപേക്ഷകൾ കളക്ട്രേറ്റിലും, കണയന്നൂർ താലൂക്കിലും, ബന്ധപ്പെട്ട വില്ലേജ് ഓഫീസുകളിലും സമർപ്പിക്കാം. മഹാരാജാസ് കോളേജ് സെന്റിനെറി ഓഡിറ്റോറിയത്തിൽ നടക്കുന്ന അദാലത്തിൽ ജില്ലാ കളക്ടർ, ജനപ്രതിനിധികൾ എന്നിവർ പങ്കെടുക്കും.