അങ്കമാലി: ബ്ലോക്ക് പഞ്ചായത്ത് സ്‌കിൽസ് എക്‌സലൻസ് സെന്ററിന്റെ നേതൃത്വത്തിൽ കേരള അഡ്മിനിസ്‌ട്രേറ്റീവ് സർവീസ് പരീക്ഷ പരിശീലനം സംഘടിപ്പിക്കുന്നു. അങ്കമാലി മേഖലയിലെ വിദ്യാഭ്യാസ വിദഗ്ദ്ധരുടെ യോഗം
റോജി എം.ജോൺ.എം.എൽ.എ ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്റ് പി.ടി പോൾ അദ്ധ്യക്ഷത വഹിച്ചു. ശ്രീശങ്കരാചാര്യ സംസ്‌കൃത സർവകലാശാല വൈസ് ചാൻസലർ ഡോ.ധർമ്മരാജ് അടാട്ട് മുഖ്യപ്രഭാഷണം നടത്തി. സ്‌കിൽസ് എക്‌സലൻസ് സെന്റർ കൺവീനർ ടി.എം. വർഗീസ് പദ്ധതി രൂപരേഖ അവതരിപ്പിച്ചു.
ബ്ലോക്ക് പഞ്ചായത്ത് കേന്ദ്രമാക്കി കെ.എ.എസ് പരീക്ഷ പ്രചാരണ, പരിശീലന പരിപാടികൾ സംഘടിപ്പിക്കുന്നതിന് റോജി.എം.ജോൺ എം.എൽ.എ, ഡോ.ധർമ്മരാജ് അടാട്ട് (രക്ഷാധികാരികൾ) പി.ടി .പോൾ (ചെയർമാൻ), ടി.എം. വർഗീസ് (കൺവീനർ), കരിയർ ഗൈഡൻസ് ബ്യൂറോ ചീഫ് എം.വി. പോളച്ചൻ, കരിയർ വിദഗ്ദ്ധൻ വിമൽ വിദ്യാധരൻ തുടങ്ങിയവർ അംഗങ്ങളുമായി കെ.എ.എസ് ഫാക്കൽറ്റി ബോർഡ് രൂപീകരിച്ചു. ബ്ലോക്ക് പഞ്ചായത്ത് വൈസ് പ്രസിഡന്റ് വത്സസേവ്യർ, സ്ഥിരം സമിതി അദ്ധ്യക്ഷന്മാരായ ടി.പി ജോർജ്, കെ.പി അയ്യപ്പൻ, എ.എ. സന്തോഷ്, എൽസി വർഗീസ്, ബി.ഡി.ഒ. എ.ജെ അജയ് എന്നിവരും വിവിധ ഉന്നത വിദ്യാഭ്യാസ സ്ഥാപനങ്ങളുടെ പ്രതിനിധികളും വിദ്യാഭ്യാസ വിദഗ്ദ്ധരും സംബന്ധിച്ചു.