മൂവാറ്റുപുഴ: മഹാത്മാഗാന്ധി ദേശിയ ഗ്രാമീണ തൊഴിലുറപ്പ് പദ്ധതിയിലെ കേരളത്തിലെ കഴിഞ്ഞ ആറുമാസത്തിലധികമായുള്ള വേതനകുടിശ്ശിക ഉടൻ അനുവദിക്കുമെന്ന് കേന്ദ്ര ഗ്രാമവികസന വകുപ്പ് മന്ത്രി നരേന്ദ്ര സിംഗ് തോമർ ഉറപ്പ് നല്കിയതായി ഡീൻ കുര്യാക്കോസ് എം.പി. അറിയിച്ചു. തൊഴിലുറപ്പ് മേഖലയിൽ 23.47 ലക്ഷത്തോളം പേർ ജോലി ചെയ്യുന്ന കേരളത്തിൽ കഴിഞ്ഞ മാർച്ച് മാസം മുതൽ വിദഗ്ദ തൊഴിലാളികളുടെ 186 കോടി രൂപയും അവിദഗ്ദ്ധ തൊഴിലാളി കളുടെ 764 കോടി രൂപയും കുടിശികയാണ്. നേരത്തേ ലോക് സഭയുടെ ശൂന്യവേളയിൽ എം.പി. ഇക്കാര്യം സഭയുടെ ശ്രദ്ധയിൽപ്പെടുത്തിയിരുന്നു.