ഇടുക്കി : മഹാത്മഗാന്ധി ഗ്രാമീണ തൊഴിലുറപ്പ് പദ്ധതിയുടെ പ്രവർത്തനങ്ങൾ വിലയിരുത്തുന്നതിന് പഞ്ചായത്ത് സെക്രട്ടറിമാരുടെയും ബ്ലോക്ക് പ്രോഗ്രാം ഓഫീസർമാരുടെയും അവലോകന യോഗം കളക്ട്രേറ്റ് കോൺഫറൻസ് ഹാളിൽ ചേർന്നു. തൊഴിലുറപ്പ് പദ്ധതികളുടെ ഭാഗമായി തീറ്റപ്പുൽകൃഷി, ഈറ്റ, മുള തുടങ്ങിയവ വിവിധ പഞ്ചായത്തുകളിൽ നട്ടുപിടിപ്പിക്കുന്നത് ആരംഭിക്കുവാനും യോഗത്തിൽ തീരുമാനിച്ചു. ആദിവാസി മേഖലകളിൽ കൂടുതൽ തൊഴിലുറപ്പ് ദിനങ്ങൾ നടപ്പിലാക്കാനും യോഗത്തിൽ ജോയിന്റ് പ്രോഗ്രാം കോർഡിനേറ്റർ ബിൻസ് സി തോമസ് പഞ്ചായത്ത് സെക്രട്ടറിമാർക്ക് നിർദേശം നൽകി.
യോഗത്തിൽ ഗ്രാമപഞ്ചായത്തുകളുടെ പുരോഗതി വിലയിരുത്തി.അവിദഗ്ദ്ധ തൊഴിൽ ദിനങ്ങൾ സൃഷ്ടിക്കൽ , പട്ടിക വർഗ്ഗ കുടുംബങ്ങൾക്ക് തൊഴിൽ നൽകൽ , സാധന സാമഗ്രികളുടെ ഉപയോഗം തുടങ്ങിയ വിവിധ ഘടകങ്ങളെ ആസ്പദമാക്കി നടത്തിയ റാങ്കിംഗിൽ കഞ്ഞിക്കുഴി ഗ്രാമപഞ്ചായത്ത് ഒന്നാം സ്ഥാനവും കൊക്കയാർ ഗ്രാമപഞ്ചായത്ത് രണ്ടാം സ്ഥാനവും , മറയൂർ , വെള്ളിയാമറ്റം ഗ്രാമപഞ്ചായത്തുകൾ മൂന്നാം സ്ഥാനവും നേടി. ജോയിന്റ് പ്രോഗ്രാം കോർഡിനേറ്റർ ബിൻസ് സി തോമസ്, ഐ.ടി പ്രൊഫഷണൽ വി. പ്രശാന്ത്, ജില്ലാ വനിതാ ക്ഷേമ ഓഫീസർ എം .ഹഫ്സ ബീബി എന്നിവർ യോഗത്തിന് നേതൃത്വം നൽകി.