കുമളി: സംസ്ഥാനത്തെ ട്രൈബൽ ലൈബ്രറികളിലെ പ്രതിനിധികളെയും ജില്ലയിലെ വിവിധ ആദിവാസി വിഭാഗങ്ങളിലെ കലാകാരൻമാരെയും പങ്കെടുപ്പിച്ച് ഇന്നുമുതൽ 17 വരെ കുമളി ഹോളിഡേ ഹോമിൽ നിറവ് ഗോത്ര സാംസ്‌കാരികോത്സവം നടത്തും.ഇന്ന് ഉച്ചയ്ക്ക് രണ്ടിന് ഗോത്രകലാരൂപങ്ങളുടെ അകമ്പടിയോടെയുള്ള വിളംബരറാലി കോവിൽമല രാജാവ് രാമൻ രാജമന്നാൻ ഫ്ളാഗ് ഓഫ് ചെയ്യും. വൈകിട്ട് നാലിന് ഗോത്രകലാപരിപാടികൾ. 16ന് രാവിലെ 10ന് ഉദ്ഘാടന സമ്മേളനം കേരള ഫോക്‌ലോർ അക്കാദമി ചെയർമാൻ സി.ജെ കുട്ടപ്പൻ ഉദ്ഘാടനം ചെയ്യും. സ്റ്റേറ്റ് ലൈബ്രറി കൗൺസിൽ പ്രസിഡന്റ് കെ.വി കുഞ്ഞിക്കൃഷ്ണൻ അദ്ധ്യക്ഷനായിരിക്കും. ലൈബ്രറി കൗൺസിൽ സെക്രട്ടറി പി അപ്പുക്കുട്ടൻ സ്വാഗതം ആശംസിക്കും. സംസ്ഥാന യുവജനകമ്മീഷൻ ചെയർപേഴ്സൺ ചിന്ത ജെറോം മുഖ്യപ്രഭാഷണം നടത്തും. 11.30ന് ആദിവാസി വികസനം സമീപനങ്ങളും സാദ്ധ്യതകളും എന്ന വിഷയത്തിൽ സെമിനാർ ഇ.എസ് ബിജിമോൾ എം.എൽ.എ ഉദ്ഘാടനം ചെയ്യും. മലയാളം സർവ്വകലാശാല സോഷ്യോളജി വിഭാഗം അസി. പ്രൊഫസർ സൂസൻ ഐസക് വിഷയാവതരണം നടത്തും. 17ന് ട്രൈബൽ ലൈബ്രറികളുടെ പ്രവർത്തനവും പരിപാടികളും എന്ന വിഷയത്തിൽ ഡോ. പി.കെ ഗോപൻ സെമിനാർ അവതരിപ്പിക്കും. ഉച്ചക്ക് രണ്ടിന് സമാപന സമ്മേളനം ചവറ കെ.എസ് പിള്ള ഉദ്ഘാടനം ചെയ്യും.ജില്ലാ ലൈബ്രറി കൗൺസിൽ പ്രസിഡന്റ് ആർ. തിലകൻ അദ്ധ്യക്ഷത വഹിക്കും. ജില്ലാ ലൈബ്രറി കൗൺസിൽ സെക്രട്ടറി ഇ.ജി. സത്യൻ സ്വാഗതവും സ്വാഗതസംഘം ചെയർമാൻ കെ.എ അബ്ദുൾ റസാഖ് നന്ദിയും പറയും.