തൊടുപുഴ: പ്ളാസ്റ്റിക് നിരോധന നടപടികൾ കർശനമായി പാലിക്കാനും ബദൽ ഉല്പന്നങ്ങൾ പരിചയപ്പെടുത്താനും അവ ഉപയോഗിക്കാനുമായി ഹരിതകേരളം മിഷൻ തദ്ദേശ സ്വയംഭരണ സ്ഥാപനങ്ങളുമായി ചേർന്ന് വിപുലമായ കാമ്പയിൻ സംഘടിപ്പിക്കുന്നു. ഇക്കോ ഫ്രണ്ട്ലിയായ ഉത്പ്പന്നങ്ങൾക്ക് പ്രചാരം നൽകാൻ വിപുലമായ പദ്ധതികളാണ് ഹരിത മിഷൻ വിഭാവന ചെയ്യുന്നത്.ഉപയോഗശേഷം പുറന്തള്ളുന്ന പ്ലാസ്റ്റിക് വസ്തുക്കൾ സൃഷ്ടിക്കുന്ന പാരിസ്ഥിതിക ആരോഗ്യ മാലിന്യ പ്രശ്‌നങ്ങൾ സജീവ ചർച്ചയാക്കി കൊണ്ട് വരുകയും പരിഹാര മാർഗങ്ങൾക്കായി നിർദേശങ്ങളും ഹരിത മിഷൻ വിവിധ സർക്കാർ, സ്വയംഭരണ സ്ഥാപനങ്ങൾ എന്നിവയ്ക്ക് നൽകിയിരുന്നു.ഇപ്പോൾ പ്രഖ്യാപിച്ച പ്ലാസ്റ്റിക് നിരോധനം പൂർണമായി അനുവർത്തിച്ച് പ്രകൃതി സൗഹൃദ ബദൽ ഉല്പന്നങ്ങളുടെ ഉപയോഗത്തിന് പ്രചാരം വർദ്ധിപ്പിക്കാൻ ലക്ഷ്യമിട്ടാണ് കാമ്പയിൻ സംഘടിപ്പിക്കുന്നത്. ഇതോടൊപ്പം കുടുംബശ്രീ, മററ് സ്വയംതൊഴിൽ സംരംഭകർ എന്നിവരെ പങ്കെടുപ്പിച്ച് ബദൽ ഉല്പന്ന നിർമ്മാണം വ്യാപകമാക്കാനുള്ള നടപടികളും സ്വീകരിക്കും. സ്വയം തൊഴിൽസംരംഭകർക്ക് അനുയോജ്യമായ സാഹചര്യമെന്ന നിലയിൽ അവർക്ക് വേണ്ട പരിശീലനവും , പുതിയ ഉത്പ്പന്നങ്ങളെക്കുറിച്ച് അവബോധം സൃഷ്ടിക്കാനും പദ്ധതിയുണ്ട്.. സംസ്ഥാനത്ത് ഹരിതനിയമങ്ങളെ സംബന്ധിച്ചുള്ള അവബോധം ജനങ്ങളിൽ വ്യാപകമാക്കാൻ ലക്ഷ്യമിട്ട് ഇതുവരെ 20 ലക്ഷം പേർക്ക് ഹരിതനിയമാവലി പരിശീലനം നൽകിയിട്ടുണ്ട്. പരിശീലനം നേടിയവരിലൂടെ സംസ്ഥാന വ്യാപകമായി പരിസ്ഥിതി സംരക്ഷണ നിയമവും ഹരിതനിയമവും പ്രചരിപ്പിക്കും. നിയമലംഘനങ്ങൾക്ക് ലഭിക്കുന്ന ശിക്ഷയും തുടർ നടപടികളും കാമ്പയിൻ പ്രവർത്തനങ്ങളിൽ ഉൾപ്പെടുത്തിയിട്ടുണ്ട്.

ബോധവൽക്കരണ സന്ദേശവും പ്രകൃതി സൗഹൃദ ബദൽ ഉല്പന്ന ഉപയോഗത്തിന്റെ സാദ്ധ്യതകളും സംബന്ധിച്ച് എല്ലാ വീടുകളിലേക്കും കുട്ടികൾ മുഖേന ആരംഭിക്കുന്ന കാമ്പയിൻ പരിപാടികൾക്ക് ജനുവരി ഒന്നിന് തുടക്കമാവും.

ഒരു തവണ മാത്രം ഉപയോഗിക്കുന്ന പ്ലാസ്റ്റിക് വസ്തുക്കളുടെ നിർമ്മാണവും വില്പനയും സൂക്ഷിക്കലും

ജനുവരി ഒന്നു മുതൽ സംസ്ഥാനത്ത് നിരോധിക്കാൻ സർക്കാർ തീരുമാനിച്ചിട്ടുണ്ട്.

ഉപയോഗ ശേഷം പുറന്തള്ളുന്ന പ്ലാസ്റ്റിക് വസ്തുക്കൾ പാരിസ്ഥിതിക ആരോഗ്യപ്രശ്‌നമായി വളർന്ന സാഹചര്യത്തിലാണ് നിരോധനം ഏർപ്പെടുത്താൻ തീരുമാനിച്ചത്.

നിരോധനം ലംഘിക്കുന്നവർക്കെതിരെ പരിസ്ഥിതി സംരക്ഷണ നിയമം 1986 പ്രകാരം കർശനമായി നടപടികൾ സ്വീകരിക്കും.

പ്ലാസ്റ്റിക് ബാഗുകൾക്ക് പകരം പരിസ്ഥിതി സൗഹൃദ ബാഗുകൾ ഉൽപാദിപ്പിക്കുന്ന യൂണിറ്റുകളെ വ്യവസായ വകുപ്പ് പ്രോത്സാഹിപ്പിക്കും.

നിരോധിച്ചവ

പ്ലാസ്റ്റിക് ക്യാരി ബാഗ് (കനം നോക്കാതെ); ടേബിളിൽ വിരിക്കാൻ ഉപയോഗിക്കുന്ന പ്ലാസ്റ്റിക് ഷീറ്റ്‌സ്; കൂളിംഗ് ഫിലിം; പ്ലേറ്റുകൾ, കപ്പുകൾ, തെർമോക്കോൾ, െ്രസ്രെറോഫോം എന്നിവ ഉപയോഗിച്ചുണ്ടാക്കുന്ന അലങ്കാര വസ്തുക്കൾ; ഒറ്റത്തവണ ഉപഭോഗമുള്ള പ്ലാസ്റ്റിക് കപ്പുകൾ; പ്ലേറ്റുകൾ; സ്പൂണുകൾ; ഫോർക്കുകൾ, സ്‌ട്രോകൾ, ഡിഷുകൾ, സ്റ്റിറർ; പ്ലാസ്റ്റിക് കോട്ടിങ് ഉള്ള പേപ്പർ കപ്പുകൾ; പ്ലേറ്റുകൾ; ബൗൾ; നോൺ വൂവൺ ബാഗുകൾ; പ്ലാസ്റ്റിക് ഫ്‌ളാഗുകൾ; പ്ലാസ്റ്റിക് ബണ്ടിംഗ്; പ്ലാസ്റ്റിക് വാട്ടർ പൗച്ചസ്; പ്ലാസ്റ്റിക് ജ്യൂസ് പാക്കറ്റുകൾ; കുടിക്കാനുള്ള പെറ്റ് ബോട്ടിലുകൾ (300 മില്ലിക്ക് താഴെ); പ്ലാസ്റ്റിക് ഗാർബേജ് ബാഗ്; പി.വി.സി ഫ്‌ളക്‌സ് മെറ്റീരിയൽസ്; പ്ലാസ്റ്റിക് പാക്കറ്റ്‌സ് എന്നിവയാണ് നിരോധിച്ചത്.

നിരോധനത്തിൽ നിന്ന് ഒഴിവാക്കിയവ

കയറ്റുമതിക്കായി നിർമിച്ചിട്ടുള്ള പ്ലാസ്റ്റിക് വസ്തുക്കൾ, ആരോഗ്യപരിപാലന രംഗത്ത് ഉപയോഗിക്കുന്ന പ്ലാസ്റ്റിക് വസ്തുക്കൾ, കമ്പോസ്റ്റബിൾ പ്ലാസ്റ്റിക്കിൽ നിന്നും നിർമ്മിച്ച വസ്തുക്കൾ (ഐ.എസ് അല്ലെങ്കിൽ ഐ.എസ്.ഒ 17088: 2008 ലേബൽ പതിച്ചത്). എന്നിവ നിരോധനത്തിൽ നിന്ന് ഒഴിവാക്കിയിട്ടുണ്ട്.