ഇടുക്കി: ട്രിപ്പ് ജീപ്പ് മറിഞ്ഞ് ജീവൻ പൊലിയുന്നത് തുടർക്കഥയായിട്ടും പഠിക്കാതെ അധികൃതരും വാഹനഡ്രൈവർമാരും. ആളെ കുത്തിനിറച്ചുള്ള തൊഴിലാളി വാഹനങ്ങളുടെ മരണപാച്ചിൽ മൂലം രണ്ട് സാധുസ്ത്രീകളുടെ ജീവൻ കൂടി ഇന്നലെ പൊലിഞ്ഞു. ഇന്നലെ രാവിലെ എട്ടരയോടെ ബൈസൺവാലി മുട്ടുകാടിന് സമീപമാണ് ജീപ്പ് മറിഞ്ഞ് രണ്ട് പേർ മരിച്ചത്. ഇറക്കവും കൊടുവളവുമുള്ള പ്രദേശത്ത് നിയന്ത്രണംനഷ്ടപ്പെട്ട ജീപ്പ് നൂറടിയോളം താഴ്ചയിലേക്ക് പതിക്കുകയായിരുന്നു. പരിക്കേറ്റവരുമായി തേനി മെഡിക്കൽ കോളേജിലേക്ക് പോയ ആംബുലൻസ് ബൈക്കിലിടിച്ച് തമിഴ്നാട് സ്വദേശിയായ ബൈക്ക് യാത്രികനും മരിച്ചത് ദുരന്തത്തിന്റെ ആഘാതം ഇരട്ടിയാക്കി.

രണ്ട് മാസം മുമ്പാണ് പുലിക്കുത്തിൽ തൊഴിലാളികളുമായി വന്ന ജീപ്പ് മറിഞ്ഞ് ആറ് പേർ മരിച്ചത്. ഇതിന് രണ്ടാഴ്ച തികയും മുമ്പ് പെരിയകനാലിന് സമീപം വീണ്ടും അപകടമുണ്ടായത്. ദിവസവും ആയിരക്കണക്കിന് തമിഴ് തൊഴിലാളികളാണ് ഹൈറേഞ്ചിലെ തോട്ടം മേഖലയിൽ തൊഴിലിൽ തേടിയെത്തുന്നത്. വണ്ടിയോടിക്കുന്നവരുടെ ആർത്തിയും അശ്രദ്ധയും കാരണം കുടുംബം പോറ്റാനായി അതിർത്തി കടന്നെത്തുന്നവരുടെ ചേതനയറ്റ ശരീരമാകും പലപ്പോഴും തിരികെ വീട്ടിലെത്തുക. അല്ലെങ്കിൽ പരസഹായമില്ലാതെ ജീവിക്കാനാകാത്ത വിധം ജീവച്ഛവങ്ങളായി മാറും.

കുത്തിനിറച്ച് പാച്ചിൽ

മതിയായ രേഖകളില്ലാത്ത കാലഹരണപ്പെട്ട വാഹനങ്ങളിൽ അനുവദനീയമായതിൽ കൂടുതൽ ആളുകളെ കയറ്റുന്നതും അമിത വേഗതയുമാണ് പലപ്പോഴും അപകടത്തിനിടയാക്കുന്നത്. ഏഴ് പേർക്ക് യാത്രചെയ്യാവുന്ന വാഹനത്തിൽ പതിനഞ്ചും അതിലധികവും തൊഴിലാളികളെയാണ് കയറ്റുന്നത്. ശ്വാസം വിടാൻപോലും കഴിയാത്ത വിധത്തിൽ ആളെ കുത്തിനിറച്ച് ചീറിപാഞ്ഞെത്തുന്ന വാഹനങ്ങൾ എല്ലാം അതിർത്തി ചെക്‌പോസ്റ്റുകൾ വഴിയാണ് കടന്നുവരുന്നത്. അതിർത്തി ചെക്‌പോസ്റ്റുകളിൽ വാഹനങ്ങൾ ഒരു പരിശോധനയും പോലുമില്ലാതെയാണ് കടത്തിവിടുന്നത്. അപകടങ്ങൾ തുടർക്കഥയായിട്ടും തൊഴിലാളി വാഹനങ്ങളുടെ മരണപ്പാച്ചിലിന് തടയിടാൻ അധികൃതർക്കാവുന്നില്ലെന്ന ആക്ഷേപം ശക്തമാണ്. ഉപജീവനത്തിനായി തമിഴ്‌നാട്ടിൽ നിന്ന് കേരളത്തിലേയ്‌ക്കെത്തുന്ന തൊഴിലാളികളുടെ സുരക്ഷ ഉറപ്പാക്കുന്നതിന് ജില്ലാ ഭരണകൂടമടം ഇടപെടണമെന്ന ആവശ്യമാണ് ഉയരുന്നത്.

അനങ്ങാതെ പൊലീസ്

പുലിക്കുത്ത് അപകടം ഉണ്ടായപ്പോൾ അനധികൃത ട്രിപ്പ് ജീപ്പുകൾ പരിശോധിക്കുമെന്നും കർശനനടപടിയെടുക്കുമെന്നും ജില്ലാ പൊലീസ് മേധാവി അറിയിച്ചിരുന്നെങ്കിലും ഒന്നും സംഭവിച്ചില്ല. പൊലീസിന്റെ നിഷ്‌ക്രിയത്വമാണ് അപകടം പതിവാകാൻ കാരണമെന്ന ആക്ഷേപം ശക്തമാണ്.