രാജാക്കാട്: രാജകുമാരി എൻ.എസ്.എസ് കോളേജിന് മുന്നിൽ ബൈക്കും കാറും കൂട്ടിയിടിച്ച് കോളേജ് വിദ്യാർത്ഥി മരിച്ചു. ഒരാൾക്ക് ഗുരുതര പരിക്കേറ്റു. എൻ.എസ്.എസ് കോളേജ് ഒന്നാം വർഷ ബി.എസ്.സി ഇലക്ട്രോണിക്‌സ് വിദ്യാർത്ഥി രാജകുമാരി ചൂടമ്മാനായിൽ ജോജിൻ ഫ്രാൻസിസാണ് (19) മരിച്ചത്. പരിക്കേറ്റ ആവണക്കുംചാൽ വട്ടുകുന്നേൽ നിതിൻ ജോസഫിനെ (21) എറണാകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. ഇടിയുടെ ആഘാതത്തിൽ ബൈക്കിന് തീപിടിച്ചത് പരിഭ്രാന്തി പരത്തി. ഇന്നലെ വൈകിട്ട് 4.35 നായിരുന്നു അപകടം. പരീക്ഷ കഴിഞ്ഞ് കോളേജിൽ നിന്നിറങ്ങിയ ജോജിനെ കൂട്ടിക്കൊണ്ട് പോകാൻ രാജകുമാരിയിലെ ഒരു കടയിൽ ജോലിക്ക് നിൽക്കുന്ന നിതിൻ എത്തിയതായിരുന്നു. കോളേജ് കോമ്പൗണ്ടിൽ നിന്ന് ഇരുവരും ബൈക്കിൽ മെയിൻ റോഡിലേക്ക് ഇറങ്ങുന്നതിനിടെ റോഡിലൂടെ കടന്നുപോകുകയായിരുന്ന കാറിൽ ഇടിക്കുകയുമായിരുന്നു. പിൻസീറ്റിൽ ഇരിക്കുകയായിരുന്ന ജോജിൻ കാറിന്റെ ഗ്ലാസിൽ ചെന്ന് ഇടിച്ചതിനെത്തുടർന്ന് തലയിലും മുഖത്തും സാരമായി പരിക്കേറ്റു. നിതിനും ശരീരത്തിൽ പലയിടത്തും കാര്യമായ മുറിവുകളുണ്ട്. ബൈക്കിന് തീപിടിച്ചെങ്കിലും ജോജിനും ജിതിനും തെറിച്ചുപോയതിനാൽ വൻ ദുരന്തം ഒഴിവായി. ഇരുവരെയും ഉടൻ തന്നെഎറണാകുളത്തെ ആശുപത്രിയിലേക്ക് കൊണ്ടുപോകും വഴി വാളറയിൽ വച്ച് ജോജിൻ മരിച്ചു. മാസങ്ങൾക്കുള്ളിൽ ഈ മേഖലയിൽ ബൈക്കപകടത്തിൽ നാല് യുവാക്കളാണ് മരിച്ചത്.