കാഞ്ഞങ്ങാട്: സ്‌കൂൾ കലോത്സവത്തിന്റെ വിളംബരമായി മേലാങ്കോട്ട് കുട്ടിക്കൂട്ടത്തിന്റെ കൊട്ടിപ്പാട്ട്. മേലാങ്കോട്ട് എ.സി.കണ്ണൻ നായർ സ്മാരക ഗവ.യു.പി.സ്‌കൂളിലെ അറുപത് യു.പി.സ്‌കൂൾ വിദ്യാർത്ഥികളാണ് കൊട്ടിയും കുഴൽ വിളിച്ചും നാട്ടുകാരിൽ കലോത്സവ സന്ദേശമെത്തിച്ചത്. നാലു തൊട്ട് ഏഴു വരെ ക്ലാസുകളിലുള്ള കുട്ടികൾ ഒരു മാസം മാത്രം നീണ്ട പരിശീലത്തിലൂടെയാണ് താളവട്ടങ്ങളുടെ വെടിക്കെട്ടുകളുതിർത്ത് ആസ്വാദകരുടെ മനം കുളിർപ്പിച്ചത്. കേരള ക്ഷേത്ര വാദ്യ കലാ അക്കാദമി ജില്ലാ സെക്രട്ടറി കൂടിയായ തായമ്പക വിദഗ്ദ്ധൻ ഉണ്ണികൃഷ്ണൻ മടിക്കൈയുടെ നേതൃത്വത്തിൽ ഉപ്പിലിക്കൈ മണികണ്ഠ മാരാർ , മടിക്കൈ ജയകൃഷ്ണമാരാർ , മടിക്കൈ ഹരീഷ് മാരാർ എന്നിവരാണ് പരിശീലകർ പഞ്ചാരിയിൽ നാലാം കാലത്തിൽ തുടങ്ങി മേളം അഞ്ചാം കാലത്തിലേക്ക് കടന്നപ്പോൾ തന്നെ നഗരം അക്ഷരാർഥത്തിൽ പൂരപ്പറമ്പായി.

ഇടക്കലാശവും കുഴമറിയലും കഴിഞ്ഞ് കൊട്ടിക്കലാശത്തിലേക്ക് കടന്നതോടെ കാഴ്ചക്കാർ കൈ ചുഴറ്റി താളം പിടിക്കാൻ തുടങ്ങി. കുട്ടികളെ മൂന്നായി തിരിച്ച് 20 പേർ വീതം വലംതലയും ഇലത്താളവും വായിച്ചു. ഗോപാലകൃഷ്ണൻ ഇരിയ ,സുരേഷ് ബാബു പനത്തടി, വിവേക് ഉപ്പിലിക്കൈ (ഇലത്താളം ) ഗോകുൽദാസ് ഉപ്പിലിക്കൈ, ശ്രീകാന്ത് ഉപ്പിലിക്കൈ, (വലം തല ) ,സതീശൻ ഉപ്പിലിക്കൈ, മനോജ് പെരു തടി, പ്രജ്വൽ തടത്തിൽ, ആകാശ് ഞാണിക്കടവ് (കൊമ്പ്) ശ്രീരാഗ് കാഞ്ഞങ്ങാട്, നവരാഗ് വെള്ളിക്കോത്ത്, ജഹനു ഞാണിക്കടവ് (കുഴൽ) എന്നിവരാണ് പിന്നണിയിൽ.

ഇക്ബാൽ സ്‌കൂളിൽ തായമ്പക വിദഗ്ദ്ധൻ ചെറുതാഴം ചന്ദ്രൻ ഉദ്ഘാടനം ചെയ്തു. അജാനൂർ ഗ്രാമപഞ്ചായത്ത് പ്രസിഡന്റ് പി.ദാമോദരൻ മുഖ്യാതിഥിയായി. പ്രധാനാധ്യാപകൻ ഡോ.കൊടക്കാട് നാരായണൻ, ജിജി തോമസ്എം ,.വി.രാഘവൻ, അനിത ഗംഗാധരൻ ,കേവീസ് ബാലകൃഷ്ണൻ, പാർവതി, കുഞ്ഞാമിന, ഹമീദ് ചെരാക്കടത്ത്, ഖാലിദ് പാലക്കി, അൻവർ ഹസ്സൻ, എം.ഹമീദ് ഹാജി, എന്നിവർ പ്രസംഗിച്ചു. കാഞ്ഞങ്ങാട് പെട്രോൾ പമ്പ് പരിസരം, മാന്തോപ്പ് മൈതാനി, നീലേശ്വരം ബസ് സ്റ്റാൻഡ് എന്നിവടങ്ങളിൽ മേളപ്പെരുമ തീർത്ത ശേഷം അതിയാമ്പൂർ പാർക്കോ ക്ലബ്ബിൽ സമാപിച്ചു. സമാപന ചടങ്ങ് നഗരസഭ ചെയർമാൻ വി.വി.രമേശൻ ഉദ്ഘാടനം ചെയ്തു.