പാലാ : കിഫ്ബിയുടെ ധനസഹായത്തോടെ പാലാ നിയോജകമണ്ഡലത്തിലെ 132 സ്‌കൂളുകളിൽ ഐ.ടി ഉപകരണങ്ങൾ അനുവദിച്ചതായി മാണി സി കാപ്പൻ എം.എൽ.എ അറിയിച്ചു. 8 മുതൽ 12 വരെ ക്ലാസുകൾ ഉൾപ്പെടുന്ന 45000 ക്ലാസ് മുറികൾ ഹൈടെക്കാക്കുന്ന പദ്ധതി, 1 മുതൽ 7 വരെ ക്ലാസുകളിൽ ലാബുകൾ സ്ഥാപിക്കുന്ന ഹൈടെക് ലാബ് പദ്ധതി എന്നിവയിൽ ഉൾപ്പെടുത്തിയാണ് ഐ.ടി ഉപകരണങ്ങൾ ലഭ്യമാക്കുന്നത്. ലാപ്‌ടോപ്പ്, പ്രൊജക്ടർ, ടെലിവിഷൻ, മൾട്ടി ഫംഗ്ഷൻ പ്രിന്റർ, ഡി എസ് എൽ ആർ കാമറ, എച്ച്.ഡി കാമറ, യു.എസ്.ബി സ്പീക്കർ തുടങ്ങിയവ കുട്ടികളുടെ എണ്ണത്തിന് ആനുപാതികമായിട്ടാണ് ലഭ്യമാക്കുന്നത്. പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി സംസ്ഥാനത്ത് നടപ്പാക്കുന്ന ഈ പദ്ധതിയിലൂടെ പാലായിലെ സ്‌കൂളുകളും സമ്പൂർണമായും ഡിജിറ്റൽ ആകുമെന്നും എം.എൽ.എ പറഞ്ഞു.