എരുമേലി : ശബരിമല മണ്ഡലകാലത്തോടനുബന്ധിച്ച് എരുമേലിയിൽ പൊലീസ് എയ്ഡ് പോസ്റ്റിന്റെയും തീർത്ഥാടനകാല കൺട്രോൾ റൂമിന്റെയും പ്രവർത്തനം തുടങ്ങി. വിവിധ വകുപ്പുകളുടെ ഏകോപനത്തിന് റവന്യൂ കൺട്രോൾ റൂം പ്രവർത്തനം ആരംഭിച്ചു. മോട്ടോർ വാഹന വകുപ്പിന്റെ സേഫ് സോൺ സബ് സെന്ററും എരുമേലിയിൽ പ്രവർത്തിക്കും. കെഎസ്ആർടിസി സെന്ററിൽ നിന്നും തീർത്ഥാടനകാല സർവീസിനും തുടക്കമായി. സർക്കാർ ആശുപത്രിയിൽ സ്‌പെഷ്യൽ ഡോക്ടർമാരും അധിക ജീവനക്കാരും ചുമതലയേറ്റു. ടൗൺ ശുചീകരണത്തിന് തമിഴ്നാട്ടുകാരായ 125 പേരുൾപ്പെട്ട വിശുദ്ധി സേനാ സംഘം നേതൃത്വം നൽകും. മാലിന്യങ്ങൾ വാരി മാറ്റാൻ ലോറി വാടകയ്ക്ക് എടുത്തിട്ടുണ്ടെന്ന് പഞ്ചായത്ത് അധികൃതർ അറിയിച്ചു. വലിയമ്പലം ജംഗ്ഷനിൽ പൊലീസ് കൺട്രോൾ റൂമിന്റെ ഉത്ഘാടനം ജില്ലാ പോലീസ് മേധാവി പി എസ് സാബു നിർവഹിച്ചു. 24 മണിക്കൂറും ടൗൺ പൂർണമായി നിരീക്ഷിക്കുന്ന 56 കാമറകൾ ഉൾപ്പെട്ട ഹൈടെക് കൺട്രോൾ റൂം പൊലീസ് സ്റ്റേഷനിൽ പ്രവർത്തിക്കുന്നുണ്ട്. റവന്യൂ കൺട്രോൾ റൂം ഉത്ഘാടനം കോട്ടയം ആർ.ഡി.ഒ അനിൽ ഉമ്മൻ നിർവഹിച്ചു. സേഫ് സോൺ സബ് സെന്ററിന്റെ ഉത്ഘാടനം മോട്ടോർ വാഹന വകുപ്പ് ഡെപ്യൂട്ടി കമ്മീഷണർ അജിത് കുമാർ നിർവഹിച്ചു. കെഎസ്ആർടിസി ബസ് സ്റ്റാന്റിന് സമീപം ദേവസ്വം കെട്ടിടത്തിലാണ് റവന്യൂ കൺട്രോൾ റൂം, സേഫ് സോൺ ഓഫീസ് എന്നിവ പ്രവർത്തിക്കുന്നത്.