കോട്ടയം : അനധി​കൃതമായി​ പെൻഷൻ വാങ്ങുന്നവർ പെരുകി​യതോടെയാണ് സർക്കാർ മസ്റ്ററിംഗ് കർക്കശമാക്കിയത്​. എന്നാൽ തുടർച്ചയായ സെർവർ പണിമുടക്ക് വയോജനങ്ങളെ കുറച്ചൊന്നുമല്ല വലയ്ക്കുന്നത്. സെർവർ പണിമുടക്ക് കാരണം പലയിടത്തും നടപടിക്രമങ്ങൾ താറുമാറായി. രാവിലെ മുതൽ അക്ഷയസെന്ററുകളിൽ വയോധികരുടെ നീണ്ടനിര കാണാമായിരുന്നു. കഴിഞ്ഞ ദിവസവും സെർവർ പണിമുടക്കിയതിനെ തുടർന്ന് ഏറെനേരം കാത്തുനിന്ന വയോധികർ നിരാശയോടെ മടങ്ങുകയായിരുന്നു. സംസ്ഥാനത്തെ എല്ലാ അക്ഷയ സെന്ററുകളിലും ഒരുമിച്ച് വെബ്സെറ്റ് തുറന്നതാണ് സെർവർ തകരാറാകാനിടയാക്കിയതെന്നാണ് അധികൃതർ പറയുന്നത്. ഇതോടെ അക്ഷയകേന്ദ്രങ്ങളിലെത്തിയവർ നിരാശരായി. ഇവർക്കെല്ലാം ടോക്കൺ നൽകി വിട്ടിരിക്കുകയാണ്. ടോക്കണിൽ പറയുന്ന തീയതികളിൽ അക്ഷയകേന്ദ്രങ്ങളിലെത്തി മസ്റ്ററിംഗ് നടത്തണം. സാമൂഹിക സുരക്ഷ പെൻഷൻ വാങ്ങുന്നവർ ആധാർകാർഡുമായി അക്ഷയ സെന്റററുകളിൽ നേരിട്ടെത്തി വ്യക്തിവിവരങ്ങൾ പുതുക്കി നൽകണമെന്നാണ് നിർദ്ദേശം. നേരിലെത്താൻ പറ്റാത്ത കിടപ്പുരോഗികൾക്കായി വീട്ടിലെത്തി മസ്റ്ററിംഗ് നടത്തും. ഇക്കാര്യം പഞ്ചായത്തുകളിൽ അറിയിക്കണം. എന്തായാലും മസ്റ്ററിംഗിനുള്ള സമയപരിധി ഡിസംബർ 15 വരെ നീട്ടിയിട്ടുണ്ട്. നേരത്തെ നവംബർ 30നായിരുന്നു സമയം. കിടപ്പുരോഗികൾക്ക് ഡിസംബർ ഒന്നു മുതൽ അഞ്ചുവരെയും കൂടുതൽ ജനവാസമുള്ള പ്രദേശങ്ങളിൽ മസ്റ്ററിംഗ് ക്യാമ്പ് നടത്താൻ ഉദ്ദേശിക്കുന്നതായും അധികൃതർ പറഞ്ഞു.

 എന്താണ് മസ്റ്ററിംഗ്

പെൻഷൻ എത്തുന്നത് യഥാർത്ഥ കൈകളിലാണെന്ന് ഉറപ്പാക്കാനാണ് മസ്റ്ററിംഗ്. പെൻഷൻ വാങ്ങിക്കൊണ്ടിരുന്നവർ മരിച്ചിട്ട് വർഷങ്ങളായിട്ടും ഇക്കാര്യം മറച്ചുവച്ച് ആശ്രിതർ ഇപ്പോഴും പെൻഷൻ വാങ്ങുന്നുണ്ട്. അതുപോലെ പുനർവിവാഹിതരും. ഇതിലൂടെ കോടികളാണ് സർക്കാരിന് നഷ്ടമായിക്കൊണ്ടിരിക്കുന്നത്. അതിന് തടയിടാനാണ് മസ്റ്ററിംഗ്. മറ്റൊരുഅർത്ഥത്തിൽ പറഞ്ഞാൽ പെൻഷൻ ലഭിക്കുന്നവരെല്ലാം ജീവിച്ചിരുപ്പുണ്ട് എന്ന് സാക്ഷ്യപെടുത്തലാണ് മസ്റ്ററിംഗ്. ഏതെങ്കിലും അക്ഷയ കേന്ദ്രത്തിൽ നേരിട്ട് പോയി വിരലടയാളം വഴിയോ, കണ്ണ് ഉപയോഗിച്ചോ മസ്റ്ററിംഗ് ചെയ്യാം. മസ്റ്ററിംഗിന് ഫീസില്ല.അക്ഷയ കേന്ദ്രങ്ങൾക്കുള്ള തുക സർക്കാർ നൽകും. ഏതെങ്കിലും അക്ഷയ കേന്ദ്രം പണം ആവശ്യപെട്ടാൽ തദ്ദേശസ്ഥാപനത്തിലോ ജില്ലാ അക്ഷയ ഓഫീസിലോ പരാതി നൽകാം.

 ആധാർ കാർഡ് വേണം

ആധാർ കാർഡ് നിർബന്ധമാണ്. പെൻഷൻ ഐഡി കൂടി കരുതുന്നത് എളുപ്പമാകും. അടുത്ത ബന്ധുക്കൾ മുഖേന പെൻഷൻ വാങ്ങുന്ന കിടപ്പുരോഗികൾ തദ്ദേശസ്ഥാപനത്തിൽ അറിയിക്കണം. വീട്ടിൽ വന്ന് മസ്റ്ററിംഗ് നടത്തും. ഇതിനും ഫീസില്ല.ആധാർ കാർഡ് ഇല്ലാത്തവർക്ക് ഗസറ്റഡ് ഓഫീസറുടെ ലൈഫ് സർട്ടിഫിക്കറ്റിന്റെ അടിസ്ഥാനത്തിൽ മാന്വൽ മസ്റ്ററിംഗ് നടത്താം.

 60 ന് താഴെയുള്ളവർ

വിധവാ പെൻഷൻ, അവിവാഹിത പെൻഷൻ എന്നിവ വാങ്ങുന്ന 60 വയസിന് താഴെയുള്ളവർ പുനർവിവാഹിത ആയിട്ടില്ല എന്ന സർട്ടിഫിക്കറ്റ് കൂടി എല്ലാ വർഷവും ഡിസംബർ മാസത്തിൽ അതത് തദ്ദേശ സ്ഥാപനത്തിൽ നൽകണം.