ചങ്ങനാശേരി: പുതുതലമുറയെ കാർന്ന് തിന്നുന്ന ലഹരിക്കെതിരെ സന്ധിയില്ലാ സമരം പ്രഖ്യാപിച്ചുകൊണ്ട് കേരളകൗമുദിയും എക്സൈസ് വകുപ്പും സംയുക്തമായി നടത്തുന്ന 'ബോധപൗർണമി' ക്യാമ്പയിൻ രണ്ടാംഘട്ടത്തിന്റെ കോട്ടയം യൂണിറ്റ്തല ഉദ്ഘാടനം നാളെ ഉച്ചയ്ക്ക് രണ്ടിന് ഇത്തിത്താനം ഹയർസെക്കൻഡറി സ്കൂളിൽ നടക്കും. കൊച്ചിൻ ഷിപ്പ് യാർഡുമായി സഹകരിച്ച് നടത്തുന്ന പരിപാടിയുടെ ഉദ്ഘാടനം ഷിപ്പിയാർഡ് ഡയറക്ടർ കം ഓഡിറ്റ് ചെയർമാൻ അഡ്വ.ബി.രാധാകൃഷ്ണമേനോൻ നിർവഹിക്കും.

വിദ്യാർത്ഥികളിൽ പിടിമുറുക്കുന്ന ലഹരി മാഫിയയ്ക്കെതിരായ ബോധത്കരണ ക്യാമ്പയിന്റെ ആദ്യഘട്ടം വിജയപ്രദമായതിന്റെ അടിസ്ഥാനത്തിലാണ് രണ്ടാം ഘട്ടത്തിലേയ്ക്ക് കടക്കുന്നത്. തിരഞ്ഞെടുക്കുന്ന സ്കൂളുകളിൽ പ്രത്യേക ബോധവത്കരണ ക്ളാസും സെമിനാറും സംഘടിപ്പിച്ച് ലഹരിയുടെ ദൂഷ്യവശങ്ങൾ ചൂണ്ടിക്കാട്ടുന്നതാണ് പദ്ധതി. സാമൂഹ്യ പ്രതിബദ്ധതയുടെ ഭാഗമായാണ് കൊച്ചിൻ ഷിപ്പ് യാർഡ് പദ്ധതിയിൽ കേരളകൗമുദിയുമായി കൈകോർക്കുന്നത്.