കോട്ടയം: മൂലവട്ടം ദിവാൻ കവലയിൽ റോഡരികിൽ പാർക്ക് ചെയ്തിരുന്ന ബൈക്ക് കത്തി നശിച്ചു. കടുവാക്കുളം തുണ്ടി പറമ്പിൽ ജിതിൻ സുരേഷിന്റെ (23) ഉടമസ്ഥതയിലുള്ള ബൈക്കാണ് കത്തി നശിച്ചത്. ഇന്നലെ രാത്രി പതിനൊന്നുമണിയോടെ ബൈക്ക് കത്തുന്നത് കണ്ട് രണ്ടു നാട്ടുകാരാണ് വിവരം ജിതിനെ അറിയിച്ചത്. തുടർന്ന് ജിതിനും കൂട്ടുകാരും എത്തിയപ്പോൾ ബൈക്ക് കത്തി നശിക്കുന്നതാണ് കണ്ടത്. തുടർന്ന് ഇവർ വിവരം അഗ്‌നിരക്ഷാസേനയിലും , പൊലീസിലും അറിയിച്ചു. സ്ഥലത്തെത്തിയ ചിങ്ങവനം പൊലീസും , അഗ്‌നിരക്ഷാസേന കോട്ടയം യൂണിറ്റിലെ ഉദ്യോഗസ്ഥരും ചേർന്ന് തീ നിയന്ത്രണവിധേയമാക്കി. പക്ഷേ അപ്പോഴേക്കും ബൈക്ക് പൂർണ്ണമായും കത്തിനശിച്ചിരുന്നു. പെട്രോൾ തീർന്നതിന്നെ തുടർന്ന് ഉച്ചയ്ക്ക് രണ്ട് മണിയോടെ ബൈക്ക് ദിവാൻ കവലയിൽ വച്ച ശേഷമാണ് ജിതിൻ കുഴിമറ്റത്തേയ്ക്ക് പോയത്.
രാത്രി 11 മണിയോടെ ദിവാൻ കവലയിൽ കൊല്ലാട് സർവീസ് സഹകരണ ബാങ്കിന് മുന്നിലെത്തിയ രണ്ടുപേർ ബൈക്കിൽ പെട്രോളൊഴിച്ച് തീ കൊളുത്തുന്നത് കണ്ടതായി നാട്ടുകാർ പൊലീസിന് മൊഴി നൽകി. ബൈക്ക് കത്തുമ്പോൾ ഇരുവരും മറ്റൊരു സ്‌കൂട്ടറിൽ കടുവാക്കുളം ഭാഗത്തേക്ക് രക്ഷപ്പെട്ടതായി നാട്ടുകാർ പറയുന്നു.