പൊൻകുന്നം: ചെമ്പൻകുളത്തെ ഒരു പെൺകുട്ടി ലണ്ടന്റെ ആകാശം കീഴടക്കാനൊരുങ്ങുന്ന വാർത്തയറിഞ്ഞ ആഹ്ലാദത്തിലാണ് കുടുംബാംഗങ്ങൾ. മുണ്ടക്കയം കൂട്ടിക്കൽ ചെമ്പൻകുളം തറവാട്ടിലെ പെൺകുരുന്നായ ഐശ്വര്യയാണ് ലണ്ടനിലെ ന്യൂഹോം കോളേജിൽ നിന്ന് എല്ലാ വിഷയങ്ങൾക്കും എ സ്റ്റാർ നേടി ആദ്യവനിതാപൈലറ്റ് എന്ന ബഹുമതിക്കായി കാത്തിരിക്കുന്നത്.
വെസ്റ്റ് സസക്സിലെ ക്രൗളി എൽത്രി ഹാരിസ് എയർലൈൻ അക്കാഡമിയിൽ പഠിക്കുന്ന ഐശ്വര്യ പൈലറ്റാകാൻ വേണ്ട 13 പ്രിലിമിനറി പരീക്ഷകളും വിജയിച്ചു. 30ലേറെ രാജ്യങ്ങളുമായി ക്യാമ്പസ് റിക്രൂട്ട്മെന്റ് കരാറുള്ള സ്ഥാപനമായതിനാൽ ജോലി ഉറപ്പാണ്. 18 വയസ്സു തികയണമെന്നുമാത്രം.
25 വർഷമായി യു.കെ.യിൽ താമസിക്കുന്ന ബിജുബാലചന്ദ്രനും രജിതയുമാണ് മാതാപിതാക്കൾ. ചേച്ചി അശ്വതി ബൾഗേറിയയിൽ മെഡിസിന് അവസാനവർഷം പഠിക്കുന്നു. കുടുംബത്തോടൊപ്പം യു.കെയിലെ മലയാളി സമൂഹവും കാത്തിരിക്കുകയാണ് ഐശ്വര്യ വിമാനം പറത്തുന്നതു കാണാൻ.