തലയോലപ്പറമ്പ്: പ്രസിദ്ധമായ തലയോലപ്പറമ്പ് തിരുപുരം ശ്രീ കൃഷ്ണസ്വാമി ക്ഷേത്രത്തിലെ പകൽപൂരം ഇന്ന് നടക്കും. വൈകിട്ട് 4ന് പൂര മൈതാനിയിൽ തന്ത്രി മുഖ്യൻ മനയത്താറ്റ് മനചന്ദ്രശേഖരൻ നമ്പൂതിരി ഭദ്രദീപപ്രകാശന കർമ്മം നിർവഹിക്കും. തുടർന്ന് 15 ഓളം ഗജവീരന്മാർ അണിനിരക്കുന്ന പകൽ പൂരത്തിന് ഗജരാജൻ പാമ്പാടി രാജൻ തിടമ്പേറ്റും. മേളകലാചക്രവർത്തി ചേരാനല്ലൂർ ശങ്കരൻകുട്ടി മാരാരുടെ പ്രമാണത്വത്തിൽ 150 ഓളം കലാകാരന്മാർ അവതരിപ്പിക്കുന്ന പാണ്ടി മേളം, കുടമാറ്റം, മയിലാട്ടം എന്നിവ പൂരത്തിന് മാറ്റ് കൂട്ടും. രാത്രി 8 ന് ദീപാരാധന 9 ന് വലിയ വിളക്ക് ദീപകാഴ്ച, കാണിക്ക എന്നിവ നടക്കും. ആറാട്ട് ദിവസമായ നാളെ രാവിലെ 10ന് ഭക്തിഗാനസുധ ഉച്ചക്ക് 12.30ന് ആറാട്ടു സദ്യ വൈകിട്ട് 4ന് കൊടിയിറക്ക് 5 ന് അയ്യൻകോവിൽ ക്ഷേത്രത്തിലേയ്ക്ക് ആറാട്ട് പുറപ്പാട്. 7 ന് ക്ഷേത്രക്കുളത്തിൽ തിരു ആറാട്ട്. 7.15ന് നൃത്തനാടകം. 8.30 ന് ആറാട്ട് എതിരേൽപ്പ്, മേജർസെറ്റ് പഞ്ചവാദ്യം രാത്രി 12 ന് ഇറക്കിപൂജ എന്നിവയോടെ ഉത്സവം സമാപിക്കും.