കൊച്ചി; പാലക്കാട്ടെ കോളേജിൽ വച്ച് നടൻ ബിനീഷ് ബാസ്റ്റിന് നേരിടേണ്ടി വന്ന അധിക്ഷേപം വലിയ വിവാദങ്ഹൾക്ക് തിരികൊളുത്തിയിരുന്നു. സംവിധായകൻ അനിൽ രാധാകൃഷ്ണ മേനോനും കോളേജ് അധികൃതർക്കുമെതിരെ രൂക്ഷവിമർശനമാണ് സംഭവത്തിന് ശേഷം ഉയർന്നത്. ഇപ്പോൾ ബിനീഷിനും അനിൽ രാധാകൃഷ്ണ മേനോനുമെതിരേ രംഗത്തെത്തിയിരിക്കുകയാണ് കോളേജ് യൂണിയൻ ചെയർമാൻ വൈഷ്ണവ്. ഒരാളുടെ ഈഗോയും രണ്ടാമന്റെ എടുത്തുചാട്ടവും ഞങ്ങളുടെ പരിപാടി കുളമാക്കി എന്നാണ് വൈഷ്ണവ് പറയുന്നത്.
ബിനീഷിനോട് തങ്ങൾ എല്ലാം പറഞ്ഞിരുന്നെന്നും അനിൽ പോയതിന് ശേഷം എത്താം എന്ന് ആദ്യം സമ്മതിച്ചതാണെന്നുമാണ് ചെയർമാന്റെ വാക്കുകള്‍. തന്റെ സിനിമയിൽ ചാന്‍സ് ചോദിച്ച് നടന്നവനൊപ്പം വേദി പങ്കിടാനാവില്ലെന്ന് അനിൽ പറഞ്ഞിരുന്നെന്നും എന്നാൽ ബിനീഷ് ബാസ്റ്റിന്റെ ജാതിയെയും മതത്തേയും പറ്റിയൊന്നും അദ്ദേഹം പറഞ്ഞിരുന്നില്ല എന്നുമാണ് ഒരുപ്രമുഖ മാദ്ധ്യമത്തിന് നൽകിയ അഭിമുഖത്തിൽ വൈഷ്ണവ് വ്യക്തമാക്കിയത്.
'എന്റെ സിനിമകളിൽ ചാൻസ് ചോദിച്ചു നടന്നവനാണ് ബിനീഷ്! അവനൊപ്പം വേദി പങ്കിടുന്നതിൽ എനിക്ക് താത്പര്യമില്ല. ബിനീഷ് വേദിയിലുണ്ടെങ്കിൽ ഞാനവിടെ ഉണ്ടാകില്ല. ഉറപ്പ്!' മാഗസിൻ പ്രകാശനം ചെയ്യുന്നതിന് മുഖ്യാതിഥിയായി ക്ഷണിക്കാൻ എത്തിയപ്പോൾ അനിൽ രാധാകൃഷ്ണ മേനോൻ പറഞ്ഞത് ഇങ്ങനെയാണ്. അതല്ലാതെ ബിനീഷ് ബാസ്റ്റിന്റെ ജാതിയെയും മതത്തെയും പറ്റിയൊന്നും അദ്ദേഹം പറഞ്ഞില്ല. ഇക്കാര്യം അറിയിച്ചപ്പോൾ പ്രകാശന ചടങ്ങിനു ശേഷം അനിൽരാധാകൃഷ്ണ മേനോന്‍ പോയിക്കഴിഞ്ഞ് കോളജ് ദിനം ഉദ്ഘാടനം ചെയ്യാൻ വേദിയിലേക്ക് എത്താം എന്ന് ഇങ്ങോട്ടു നിർദേശിച്ചത് ബിനീഷാണ്. എന്നിട്ട് അപ്രതീക്ഷിതമായി അദ്ദേഹം വികാര പ്രകടനം നടത്തുകയായിരുന്നു. ചുരുക്കി പറഞ്ഞാൽ ഒരാളുടെ ഈഗോയും രണ്ടാമന്റെ എടുത്തു ചാട്ടവും കൂടി ഞങ്ങളുടെ പരിപാടി കുളമാക്കുകയായിരുന്നു.'
അനിലിന്റെ നിബന്ധന അറിയിച്ചപ്പോൾ 'അനിൽ സാർ അദ്ദേഹത്തിന്റെ പരിപാടി കഴിഞ്ഞ് പോട്ടെ, നമ്മുടെ പരിപാടി അടിപൊളിയാക്കാം ഞാനുണ്ട് കൂടെ പരിപാടി കുളമാകില്ല' എന്നാണ് ബിനീഷ് പറഞ്ഞത്. എന്നാൽ പരിപാടി തുടങ്ങിയതിന് പിന്നാലെ ഞൊടിയിടയിൽ ഭാവം മാറിയ ബിനീഷ് സ്റ്റേജിലേക്ക് പോയേ തീരു എന്ന് ശഠിക്കുകയായിരുന്നുവെന്നും വൈഷ്ണവ് പറയുന്നു.
'പിന്നീട് നടന്നത് എല്ലാവരും കണ്ടതാണ്. കുത്തിയിരിക്കുന്നു.. ആരോ എഴുതി കൊടുത്ത പേപ്പറിലെ വാചകങ്ങൾ നോക്കി സ്‌റ്റേജില്‍ വായിക്കുന്നു... ആകെ സീൻ... അതു വരെ തികച്ചു സന്തോഷവാനായിരുന്ന ബിനീഷ് പരിപാടിയുടെ ഇടയിലേക്ക് ഇങ്ങനെ കടന്നു വന്ന് പ്രതിഷേധിച്ചതു പിന്നിലുള്ള കാരണമെന്താണ് എന്ന് എനിക്ക് ഇപ്പോഴും അറിയില്ല. ജാതി മതം മനുഷ്യൻ എന്നൊക്കെ പറഞ്ഞ് വികാരാധീനനാകേണ്ട ഒരു സാഹചര്യവും അവിടെ ഉണ്ടായിരുന്നില്ല. എല്ലാം ബിനീഷ് ബാസ്റ്റിൻ സമ്മതിച്ചതാണ്.' വൈഷ്ണവ് പറഞ്ഞു.
''അനിൽ സാറിന് നിങ്ങളുമായി വേദി പങ്കിടാൻ കഴിയില്ല' എന്ന് ഞങ്ങൾ പറഞ്ഞിട്ടില്ല. ഇങ്ങനെയൊരു ആശയക്കുഴപ്പം നിലനില്‍ക്കുന്നുണ്ട്, 'എന്ത് ചെയ്യും' എന്ന് ചോദിക്കുക മാത്രമാണ് ചെയ്തത്. അത് ഇത്രയും വിവാദമാക്കിയത് എന്തിനാണെന്ന് മനസ്സിലാകുന്നില്ലെന്നും വൈഷ്ണവ് ചോദിച്ചു. എസ്.എഫ്‌.ഐയാണ് കോളേജ് യൂണിയൻ ഭരിക്കുന്നത്.