തിരുവനന്തപുരം: സെക്കൻഡ് ഹാൻഡ് വാഹനം വിൽപ്പനയ്ക്ക് ഉണ്ടെന്ന തരത്തിൽ തട്ടിപ്പ് നടത്തുന്നവർക്കെതിരെ മുന്നറിയിപ്പ് നൽകി കേരള പൊലീസിന്റെ ഫേസ്ബുക്ക് പോസ്റ്റ്. ഓൺലൈൻ മാർക്കെറ്റിംഗ് പ്ലാറ്റ്ഫോമായ ഒ.എൽ.എക്സിൽ വന്ന ഒരേ മാതൃകയിലുള്ള നിരവധി പരസ്യങ്ങൾ ചൂണ്ടിക്കാട്ടിയാണ് പൊലീസ് മുന്നറിയിപ്പ് നൽകുന്നത്. ഒരു പട്ടാളക്കാരന്റെ വാഹനം എന്ന മട്ടിൽ തട്ടിപ്പുകാർ നൽകിയ പരസ്യങ്ങൾ കണ്ട് ചെന്ന ഇരുപതോളം പേർക്ക് പണം നഷ്ടമായിട്ടുണ്ടെന്നും ഫേസ്ബുക്ക് കുറിപ്പിൽ പറയുന്നുണ്ട്. അഡ്വാൻസ് തുക ഓൺലൈനായി കൈമാറാൻ ഇവർ ആവശ്യപ്പെടുന്നതനുസരിച്ച് അങ്ങനെ ചെയ്തവർക്കാണ് പണം നഷ്ടമായത്. ഈ പോസ്റ്റിനൊപ്പം രസകരമായ ഒരു ട്രോളും പൊലീസുകാർ പങ്കുവച്ചിട്ടുണ്ട്. ഇത്തരം ഇടപാടുകളിൽ വിശ്വാസം ഉറപ്പാക്കിയ ശേഷം മാത്രമേ ഇടപെടാവൂ എന്നും പൊലീസ് ഉപദേശിക്കുന്നുണ്ട്.

കേരള പൊലീസിന്റെ ഫേസ്ബുക്ക് പോസ്റ്റിന്റെ പൂർണരൂപം:

'ശ്രദ്ധിക്കുക 🔴 സൂക്ഷിക്കുക🔴 ഒരേ വാഹനത്തിൻ്റെ ചിത്രം "വാഹനം വില്പനയ്ക്കുണ്ടെന്ന തരത്തിൽ" വ്യത്യസ്ത സ്ഥലങ്ങളിൽ നിന്നും olx ൽ പോസ്റ്റ് ചെയ്തു പണം തട്ടുന്നതായി നിരവധി പരാതികൾ ലഭിച്ചിട്ടുണ്ട്. ഇതുവരെ ഈ വാഹനത്തിൻ്റെ പേരിൽ ഇരുപതോളം പേർക്ക് പണം നഷ്ടമായിട്ടുള്ളതായാണ് ലഭിച്ച പരാതികൾ സൂചിപ്പിക്കുന്നത്. പട്ടാളക്കാരൻ്റെ പേരിലുള്ള വാഹനം എന്ന തരത്തിലാണ് പരസ്യം കണ്ടു സമീപിക്കുന്നവരോട് തട്ടിപ്പുകാർ ഇടപെടുന്നത്. വാഹനം ഇഷ്ടപ്പെട്ടാൽ അഡ്വാൻസ് തുക ഓൺലൈൻ വഴി കൈമാറാൻ ആവശ്യപ്പെടുന്നു. അന്വേഷണത്തിൽ അന്യസംസ്ഥാനത്തു നിന്നാണ് തട്ടിപ്പ് നടത്തുന്നതെന്നത് വെളിവായിട്ടുണ്ട്. ജാഗ്രത പാലിക്കുക.. ഇത്തരം ഇടപാടുകളിൽ വിശ്വാസ്യത ഉറപ്പാക്കിയിട്ടു മാത്രം പണം കൈമാറുക🙏 #keralapolice #onlinefraud '