മലയാളി സംവിധായകൻ ജീത്തു ജോസഫ് ആദ്യമായി സംവിധാനം ചെയ്യുന്ന ബോളിവുഡ് ചിത്രം 'ദി ബോഡി'യുടെ ട്രെയിലർ പുറത്തിറങ്ങി. ത്രില്ലർ സിനിമകളിലൂടെ ശ്രദ്ധേയനായ ജീത്തു ജോസഫിന്റെ ബോളിവുഡ് സിനിമയും അതേരീതി പിന്തുടരുന്നതാണെന്ന് ട്രെയിലറില്‍ നിന്നും വ്യക്തമാണ്.
ഋഷി കപൂര്‍, ഇമ്രാൻ ഹാഷ്മി, ശോഭിത ദുലിപാല, വേദിക എന്നിവരാണ് ചിത്രത്തിലെ പ്രധാനകഥാപാത്രങ്ങളെ അവതരിപ്പിക്കുന്നത്. 2012ൽ ഇതേ പേരില്‍ റിലീസ് ചെയ്ത സ്പാനിഷ് ചിത്രത്തിന്റെ റീമേക്ക് ആണ് 'ദി ബോഡി'.
രണ്ട് മിനിറ്റ് ദൈർഘ്യമുള്ള ട്രെയിലറില്‍ ഉദ്വേഗഭരിതമായ രംഗങ്ങളാണ് തുറന്ന് കാണിക്കുന്നത്. കാണാതെ പോകുന്ന ഒരു മൃതദേഹത്തെ ചുറ്റിപ്പറ്റിയാണ് കഥ. വയാകോം 18 സ്റ്റുഡിയോസ് നിർമ്മിക്കുന്ന ചിത്രം ഡിസംബർ 13ന് തിയേറ്ററുകളിലെത്തും.