ന്യൂഡൽഹി : മുസ്ലിങ്ങളും ശ്രീരാമനെ ശ്രീരാമനെ ആരാധിച്ചിരുന്നെന്ന് യോഗാ ഗുരു ബാബാ രാംദേവ്. ഇന്ത്യയിലെ 99 ശതമാനം മുസ്ലിങ്ങളും മതപരിവർത്തനം ചെയ്യപ്പെട്ട് എത്തിയവരാണെന്നാണ് വിശ്വസിക്കുന്നതെന്നും രാംദേവ് പറഞ്ഞു. അയോദ്ധ്യകേസിലെ സുപ്രീംകോടതി വിധിയിൽ പ്രതികരിച്ച് ഒരുദേശീയ മാദ്ധ്യമത്തിന് നൽകിയ പ്രത്യേക അഭിമുഖത്തിലാണ് രാംദേവ് ഇക്കാര്യം വ്യക്തമാക്കിയത്.

സുപ്രീംകോടതി വിധിയെ രാജ്യത്തിന്റെ ഐക്യത്തിന്റെ ഭാഗമായാണ് കാണുന്നത്. രാമക്ഷേത്രം ഏറ്റവും മനോഹരമായി നിർമ്മിക്കണമെന്നതാണ് ഇന്ത്യയിലെ ഹിന്ദുക്കളുടെ സ്വപ്നം. നമ്മുടെ സാസ്കാരിക പാരമ്പര്യത്തെ പ്രതിഫലിപ്പിക്കുന്നതാവണം ക്ഷേത്രം. ഹിന്ദുക്കൾക്ക് മാത്രമല്ല മുസ്ലിങ്ങൾക്കും ശ്രീരാമൻ ആരാധ്യപുരുഷനായിരുന്നുവെന്ന് ബാബാ രാംദേവ് പറഞ്ഞു.

കത്തോലിക്കക്കാർക്ക് വത്തിക്കാൻ പോലെ, മുസ്ലിങ്ങൾക്ക് മക്ക പോലെ, സിഖ് മതവിശ്വാസികൾക്ക് സുവർണക്ഷേത്രം പോലെ തന്നെയാണ് ഹിന്ദുക്കൾക്ക് അയോധ്യയെന്നും രാമക്ഷേത്രം നിർമ്മിക്കാൻ മുസ്ലിങ്ങളും പള്ളി പണിയാൻ ഹിന്ദുക്കളും പരസ്പരം സഹായിക്കണമെന്നും രാംദേവ് കൂട്ടിച്ചേർത്തു.