കോഴിക്കോട് : അപൂർവ രോഗം ബാധിച്ച ഒരു മാസം പ്രായമായ കുഞ്ഞിനെ റോഡുമാർഗം അടിയന്തര ശസ്ത്രക്രിയയ്ക്കുവേണ്ടി കോഴിക്കോടുനിന്ന് കൊച്ചിയിലെത്തിക്കുന്നു. കോഴിക്കോട് മെഡിക്കൽ കോളേജിൽ നിന്ന് കൊച്ചി അമൃത ആശുപത്രിയിലേക്ക് ആംബുലൻസ് പുറപ്പെട്ടു. ആരോഗ്യമന്ത്രിയുടെ ഇടപെടലിനെ തുടർന്ന് പൊലീസ് സുരക്ഷയിൽ പ്രത്യേക ആംബുലൻസിലാണ് കൊണ്ടു പോകുന്നത്.

വാഹനം കടന്നുപോകുന്ന വഴിയിലെ യാത്രക്കാർ ആംബുലൻസ് കടന്നുപോകാൻ വഴിയൊരുക്കണമെന്ന് പൊലീസും അധികൃതരും അഭ്യർത്ഥിച്ചു.

തൊണ്ടയാട്, രാമനാട്ടുകര, തേഞ്ഞിപ്പലം, എടപ്പാൾ, തൃശ്ശൂർ, ചാലക്കുടി, അങ്കമാലി വഴിയാവും ആംബുലൻസ് കടന്നുപോവുക.

ശ്വാസകോശത്തിൽ ഫ്ളൂയിഡ് നിറഞ്ഞ് ശ്വാസതടസമുണ്ടാകുന്ന ഗുരുതര രോഗാവസ്ഥയായ സൈലോതൊറാക്സാണ് കുട്ടിക്കെന്നാണ് ഡോക്ടർമ‌ാർ പറയുന്നത്. പാലക്കാട് സ്വദേശി സ്വനൂപാണ് കുട്ടിയുടെ അച്ഛൻ.