ഷൂട്ടിഗിനിടെ ഹൃദയാഘാതം സംഭവിച്ചതിനെത്തുടർന്ന് യുവനടിയെ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചു. ഹിന്ദി, തെലുങ്ക് സിനിമകളിലെ നടിയും മോഡലും ടെലിവിഷൻ അവതാരകയുമായ ഗഹന വസിഷ്ടിനെയാണ് ആശുപത്രിയിൽ പ്രവേശിപ്പിച്ചിരിക്കുന്നത്. വടക്കൻ മുംബയിലെ മഠ് ദ്വീപിൽ ഒരു വെബ് സിരീസിന്റെ ചിത്രീകരണത്തില്‍ പങ്കെടുക്കുകയായിരുന്നു ഗഹന. ചിത്രീകരണത്തിനിടെ ബോധരഹിതയായി കുഴഞ്ഞുവീണതിനെത്തുടർന്ന് അവരെ മലാഡിലുള്ള രക്ഷ ആശുപത്രിയിൽ പ്രവേശിപ്പിക്കുകയായിരുന്നു.

കാര്യമായ ഭക്ഷണമൊന്നും കഴിക്കാതെ 48 മണിക്കൂറിനടുത്ത് ഗഹന ജോലി ചെയ്യുകയായിരുന്നുവെന്നാണ് ഡോക്ടറും രക്ഷാ ആശുപത്രി മേധാവിയുമായ പ്രണവ് കബ്ര പറയുന്നത്. വെന്റിലേറ്റർ അടക്കമുള്ള സംവിധാനങ്ങളുടെ സഹായത്തോടെയാണ് ഗഹനയുടെ പരിചരണമെന്നും ഏറെ ഗുരുതരമാണ് നിലവിലെ സ്ഥിതിയെന്നും ഡോക്ടർ പറയുന്നു.

പ്രമേഹത്തിന് ചികിത്സ നടത്തുന്നയാളുമാണ് ഗഹന. പ്രമേഹത്തിന്റെ മരുന്നുകൾക്കൊപ്പം ജോലിക്കിടയിൽ ചില എനർജി ഡ്രിങ്കുകളും ഉപയോഗിച്ചതാണോ ഇതിലേക്ക് നയിച്ചതെന്ന് പരിശോധനകൾക്ക് ശേഷമേ പറയാനാവൂയെന്നും ഡോക്ടർ പറയുന്നു..