തിരുവനന്തപുരം: രാത്രി കമ്പിപ്പാരയുമായി കവർച്ചയ്ക്കിറങ്ങിയ കുപ്രസിദ്ധ മോഷ്ടാവ് വള്ളക്കടവ് സ്വദേശി ഷാരൂഖാനും കൂട്ടാളി ജിതിനും പേട്ടയിൽ വാഹന പരിശോധനയ്ക്കിടെ പൊലീസ് പിടിയിലായി. ഇന്നലെ രാത്രിയാണ് ഇവർ പിടിയിലായത്. പോത്തൻകോട് ഭാഗത്ത് വീട് കവർച്ച ചെയ്യാനായി പോകുകയായിരുന്നുവെന്ന് ഇവർ ചോദ്യം ചെയ്യലിൽ സമ്മതിച്ചു.

നിരവധി മാലപൊട്ടിക്കൽ കേസുകളിലും ക്രിമിനൽ കേസുകളിലും പ്രതികളാണ് ഇവർ. പേട്ട ജംഗ്ഷന് സമീപം വാഹന പരിശോധനയ്‌ക്കിടെയാണ് ബൈക്കിലെത്തിയ ഇവർ പൊലീസിന്റെ പിടിയിലായത്. ഷാരൂഖാനെ തിരിച്ചറിഞ്ഞ പൊലീസ് സംഘം വിശദമായി ചോദ്യം ചെയ്‌തശേഷം ബൈക്ക് പരിശോധിച്ചപ്പോഴാണ് ബൈക്കിൽ ഒളിപ്പിച്ച് വച്ച നിലയിൽ കമ്പിപ്പാര കണ്ടെത്തിയത്. തുടർന്ന് ഇവരുടെയും പൊലീസ് സ്റ്റേഷനിലെത്തിക്കുകയായിരുന്നു. വിശദമായി ചോദ്യം ചെയ്തപ്പോൾ പോത്തൻകോടിന് സമീപം വീട് കവർച്ച ചെയ്യാനായി ജിതിനെയും കൂട്ടി പോകുകയായിരുന്നുവെന്ന് സമ്മതിച്ചു. കവർച്ചാശ്രമത്തിനും ആയുധം കൈവശം സൂക്ഷിച്ചതിനും കേസെടുത്ത് അറസ്റ്റ് ചെയ്‌തശേഷം ഇന്ന് കോടതിയിൽ ഹാജരാക്കും.