മെക്‌സിക്കോ സിറ്റി: നിരവധി റെക്കാർഡുകൾ ഭേദിച്ച, ലോകപ്രശസ്ത അമേരിക്കൻ റോക്ക് ക്ലൈംബർ ബ്രാഡ് ഗോബ്രൈറ്റ് (31) സാഹസിക മലകയറ്റത്തിനിടെ 600 അടി താഴ്ചയിലേക്ക് വീണു മരിച്ചു.

ബുധനാഴ്ച വടക്കൻ മെക്​സികോയിലെ എൽ പോട്രെറോ ചികോ കൊടുമുടിയിലെ കിഴുക്കാംതൂക്കായ പാറക്കൂട്ടത്തിൽ നിന്നാണ് മരണത്തിലേക്ക് വീണത്.

അമേരിക്കക്കാരനായ എയ്​ഡൻ ജേക്കബ്​സണിനൊപ്പം (26) രണ്ട്​ ദിവസം കൊണ്ട്​ 2500അടി ഉയരമുള്ള കൊടുമുടിയുടെ മുകളിലെത്തി തിരിച്ചിറങ്ങുമ്പോഴായിരുന്നു അപകടം.

260 അടി നീളമുള്ള വടം ഉപയോഗിച്ചാണ് ഇരുവരും പാറക്കെട്ട് കയറിയിരുന്നത്.

പാറയുടെ കുത്തനെയുള്ള ഭാഗത്തുകൂടി ഒറ്റ കയറിൽ തൂങ്ങി താഴേക്ക്​ ഇറങ്ങുമ്പോൾ (ഒറ്റ കയറിന്റെ ഇരുവശത്തും തൂങ്ങിപ്പിടിച്ച് ഇരുവരുടെയും ശരീരഭാരം പരസ്​പരം ബാലൻസ്​ ചെയ്യുന്ന സിമുൽ-റാപ്പല്ലിംഗ് രീതി) പിടിവഴുതി വീഴുകയായിരുന്നു. വടത്തിൽ പിടിക്കാനുള്ള കെട്ടുകളില്ലായിരുന്നു.

വീഴുന്നതിനിടെ പാറയുടെ തള്ളി നിൽക്കുന്ന ഭാഗത്തെ കുറ്റിച്ചെടിയിലേക്ക്​ പതിച്ചതിനാൽ ജേക്കബ്​സൺ തലനാരിഴയ്ക്ക് മരണത്തിൽ നിന്ന് രക്ഷപെട്ടു. കാലിനും ശരീരത്തിനും സാരമായി പരിക്കേറ്റ ജേക്കബ്​സൺ ചികിത്സയിലാണ്​.

‘ഗോബ്രൈറ്റിനേക്കാൾ അൽപം മുകളിലായിരുന്നു ഞാൻ. ഞാൻ ഇടതുവശത്തും ഗോബ്രൈറ്റ്​ വലതുവശത്തും. ​പെട്ടന്നാണ്​ താഴേക്ക്​ പതിച്ചത്​’- ജേക്കബ്​സൺ പറഞ്ഞു.

ഗോബ്രൈറ്റ്

 ഒറ്റയ്ക്ക് അ പകടകരമായ പാറക്കെട്ടുകള്‍ കയറുന്ന സാഹസികൻ

 സുരക്ഷാ സംവിധാനങ്ങൾ ഉപയോഗിക്കാറില്ല

 2017ൽ കാലിഫോർണിയയിലെ യോസ്​മൈറ്റ്​ നാഷണൽ പാർക്കി​ലുള്ള എൽ ക്യാപ്​റ്റൻ കൊടുമുടി റെക്കോർഡ്​ വേഗത്തിൽ കയറി പ്രശസ്​തനായി