കൊല്ലം: എച്ച്.ഡി.എഫ്.സി ബാങ്കിൽ നിന്ന് വാഹന വായ്പയെടുത്ത യുവതി വായ്പ തിരിച്ചടച്ച് എൻ.ഒ.സി വാങ്ങിയിട്ടും വായ്പാ തിരിച്ചടവ് മുടങ്ങിയെന്ന പേരിൽ പൊലീസിനെക്കൊണ്ട് അറസ്​റ്റ് ചെയ്യിച്ചുവെന്ന പരാതിയിൽ വനിതാ കമ്മിഷൻ കേസെടുത്തതായി കമ്മിഷനംഗം ഡോ. ഷാഹിദാ കമാൽ അറിയിച്ചു. ബാങ്കിന്റെ ഭാഗത്ത് നിന്നുണ്ടായ വീഴ്ച്ചയുടെ ഫലമായി ഒരു സ്ത്രീ കോടതി കയറേണ്ടി വന്നത് ഗൗരവമായാണ് കാണുന്നത്. യുവതിയെ പൊലീസ് അറസ്​റ്റ് ചെയ്ത് ജീപ്പിൽ കയ​റ്റിക്കൊണ്ടുപോയതിനെ തുടർന്ന് വാടക വീട്ടിൽ നിന്ന് ഉടമസ്ഥൻ ഇറക്കിവിട്ടതായും കമ്മിഷനിൽ ലഭിച്ച പരാതിയിലുണ്ട്. ഇപ്പോൾ ഇവർക്ക് താമസിക്കാൻ ഇടമില്ലാത്ത സാഹചര്യമാണ്. ഇത്രയും ഗുരുതര വീഴ്ച ബാങ്കിന്റെ ഭാഗത്ത് നിന്നുണ്ടായതിനെതിരെ കമ്മിഷൻ കർശന നടപടി സ്വീകരിക്കും. 2016 ൽ എച്ച്.ഡി.എഫ്.സി ബാങ്കിൽ നിന്ന് ഇരുചക്രവാഹനം വാങ്ങാൻ യുവതി വായ്പ എടുത്തിരുന്നു. ഇടയ്ക്ക് കുടിശ്ശിക വന്നപ്പോൾ ബാങ്ക് കോടതിയെ സമീപിച്ചു. തുടർന്ന് കോടതിയിൽ നിന്ന് സമൻസ് വരികയും യുവതി ബാങ്കുമായി ബന്ധപ്പെട്ട് കുടിശ്ശിക അടച്ച് തീർക്കുകയും ചെയ്തു. കോടതി ചെലവിനായും പണം നൽകി. 2018 -ഓടെ മുഴുവൻ വായ്പാ തുകയും ബാങ്കിൽ അടച്ച് തീർത്ത് എൻ.ഒ.സി വാങ്ങി കയ്യിൽ വച്ചു. വാഹനം മ​റ്റൊരാൾക്ക് വിൽക്കുകയും ചെയ്തു. എന്നാൽ ബാങ്ക് കൃത്യസമയത്ത് കോടതിയിൽ രേഖകൾ ഹാജരാക്കാത്തതിനെ തുടർന്ന് സമൻസ് വാറണ്ടാവുകയും വാറണ്ടിന്റെ അടിസ്ഥാനത്തിൽ യുവതിയെ പൊലീസെത്തി അറസ്​റ്റ് ചെയ്യുകമായിരുന്നു. തന്റെ പേരിലുളള കേസെന്താണെന്ന് പോലും യുവതിക്ക് അറിയില്ലായിരുന്നു. കോടതിയിൽ ഹാജരാക്കിയപ്പോഴാണ് തന്റെ പേരിലെ കേസ് എന്താണെന്നറിയുന്നത്. യുവതിയുടെ നിരപരാധിത്വം ബോദ്ധ്യപ്പെട്ട കോടതി വെറുതെ വിടുകയായിരുന്നു. എന്നാൽ നാട്ടുകാരുടെ മുന്നിലൂടെ തന്നെ പൊലീസ് ജീപ്പിൽ കയ​റ്റികൊണ്ടുപോയി അപമാനിക്കുകയും പിന്നീട് വാടക വീട് പോലും നഷ്ടപ്പെടുകയും ചെയ്ത സാഹചര്യത്തിൽ ബാങ്കിനെതിരെ ശക്തമായ നിയമ പോരാട്ടം നടത്തുമെന്ന് യുവതി കമ്മിഷനോട് പറഞ്ഞു. ഇതിനു വേണ്ട മുഴുവൻ പിന്തുണയും കമ്മിഷൻ നൽകുമെന്ന് ഡോ.ഷാഹിദാ കമാൽ ഉറപ്പ് നൽകി.