കൊട്ടാരക്കര: കേരള മുഖ്യമന്ത്രി എസ്.എൻ.ഡി.പി യോഗം ജനറൽ സെക്രട്ടറി കൊട്ടാരക്കര യൂണിയൻ സ്ഥാപക പ്രസിഡന്റ് തുടങ്ങിയ നിലകളിൽ സേവനമനുഷ്ഠിച്ച ആർ. ശങ്കറിന്റെ 47-ാം ചരമ വാർഷികവും അനുസ്മരണ സമ്മേളനവും ഇന്ന് കൊട്ടാരക്കര എസ്.എൻ.ഡി.പി താലൂക്ക് യൂണിയന്റെ നേതൃത്വത്തിൽ സംഘടിപ്പിക്കും, ഇതോടനുബന്ധിച്ച് ദീപശിഖാ റിലേ, അനുസ്മരണ സമ്മേളനം, പുഷ്പാർച്ചന തുടങ്ങിയവ ഉണ്ടായിരിക്കും.

രാവിലെ 9ന് പാങ്ങോട് ആർ. ശങ്കർ ആശുപത്രി ഗ്രൗണ്ടിൽ യൂത്തുമൂവ്മെന്റ് യൂണിയൻ ചെയർമാൻ വി. അനിൽകുമാറിന്റെ അദ്ധ്യക്ഷതയിൽ ചേരുന്ന സമ്മേളനത്തിൽ യൂത്ത് മൂവ്മെന്റ് ജില്ലാ ചെയർമാൻ അ‌ഡ്വ. പി. അരുൾ വോളണ്ടിയർമാർക്ക് ദീപശിഖ തെളിച്ച് കൈമാറി റിലേ ഉദ്ഘാടനം ചെയ്യും. തുടർന്ന് കാരിക്കൽ, പുത്തൂർ, ചുങ്കത്തറ, വെണ്ടാർ, മൂഴിക്കോട്, കോട്ടാത്തല പണയിൽ, അവണൂർ, പുലമൺ, യൂണിയൻ ഓഫീസ്, നെടുവത്തൂർ, അമ്പലത്തുംകാല, എഴുകോൺ, നെടുമ്പായിക്കുളം വഴി യൂണിയൻ അതിർത്തിയായ ആറുമുറിക്കടയിലെത്തും.

തുടർന്ന് കുണ്ടറ യൂണിയൻ ഭാരവാഹികൾ ദീപശിഖ റിലേയെ ഏറ്റുവാങ്ങും. 11ന് യൂണിയൻ മന്ദിരാങ്കണത്തിൽ ചേരുന്ന അനുസ്മരണ സമ്മേളനം അടൂർ പ്രകാശ് എം.പി ഉദ്ഘാടനം ചെയ്യും. യൂണിയൻ പ്രസിഡന്റ് സതീഷ് സത്യപാലൻ അദ്ധ്യക്ഷത വഹിക്കും. യൂണിയൻ സെക്രട്ടറി ജി. വിശ്വംഭരൻ ആമുഖ പ്രസംഗം നടത്തും. യോഗം ബോർഡ് മെമ്പർമാരായ അഡ്വ. പി. സജീവ് ബാബു, അഡ്വ. എൻ. രവീന്ദ്രൻ, അഡ്വ. പി. അരുൾ, യൂത്ത്മൂവ്മെന്റ് യൂണിയൻ ചെയർമാൻ വി. അനിൽകുമാർ, വനിതാ സംഘം യൂണിയൻ കൺവീനർ ഡോ. സബീന വാസുദേവ് എന്നിവർ സംസാരിക്കും. യൂണിയൻ വൈസ് പ്രസിഡന്റ് ജി. മധുസൂദനൻ നന്ദി പറയും.