പരവൂർ: ആർ. ശങ്കർ മികച്ച ഭരണാധികാരിയും ദീർഘവീക്ഷണമുള്ള ജനകീയ നേതാവുമായിരുന്നെന്ന് മുൻ എം.പി എൻ. പീതാംബരക്കുറുപ്പ് പറഞ്ഞു. ആർ. ശങ്കറിന്റെ 47-ാം ചരമ വാർഷിക ദിനാചരണത്തിന്റെ ഭാഗമായി പരവൂർ നോർത്ത് മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ നടന്ന ആർ. ശങ്കർ അനുസ്മരണം ഉദ്‌ഘാടനം ചെയ്യുകയായിരുന്നു അദ്ദേഹം. ആർ. ശങ്കറിന്റെ രഷ്ട്രീയ പ്രവർത്തനവും സമുദായ പ്രവർത്തനവും സമൂഹനന്മയ്ക്ക് വേണ്ടിയായിരുന്നെന്നും പീതാംബരക്കുറുപ്പ് വ്യക്തമാക്കി. മണ്ഡലം കോൺഗ്രസ് കമ്മിറ്റി പ്രസിഡന്റ് പരവൂർ മോഹൻ ദാസ് അദ്ധ്യക്ഷത വഹിച്ചു. യു. ഡി.എഫ് ചെയർമാൻ പരവൂർ രമണൻ, ബിജു പാരിപ്പള്ളി, പരവൂർ സജീബ്, വി. പ്രകാശ്, എൻ. രഘു, നെല്ലേറ്റിൽ ബാബു, ശിവപ്രകാശ് , ജയശങ്കർ, എസ്. സുനിൽകുമാർ, രഞ്ജിത് പരവൂർ എന്നിവർ സംസാരിച്ചു.