കരുനാഗപ്പള്ളി : കാവ്യരചനയിൽ 65 വർഷം പൂർത്തിയാക്കുന്ന കവി ചവറ കെ. എസ്. പിള്ളയെ താലൂക്ക് ലൈബ്രറി കൗൺസിൽ ആദരിച്ചു. കരുനാഗപ്പള്ളി ഐ.എം.എ ഹാളിൽ സംഘടിപ്പിച്ച അനുമോദന സമ്മേളനം സാഹിത്യ പ്രവർത്തക സഹകരണ സംഘം പ്രസിഡന്റും കവിയുമായ ഏഴാച്ചേരി രാമചന്ദ്രൻ ഉദ്ഘാടനം ചെയ്തു. ജില്ലാ ലൈബ്രറി കൗൺസിൽ വൈസ് പ്രസിഡന്റ് പി. ചന്ദ്രശേഖരപിള്ള അദ്ധ്യക്ഷത വഹിച്ചു. സെക്രട്ടറി വി. വിജയകുമാർ സ്വാഗതം പറഞ്ഞു. ആലങ്കോട് ലീലാകൃഷ്ണൻ മുഖ്യപ്രഭാഷണം നടത്തി. ചവറ കെ.എസ്. പിള്ളയുടെ കവിതകളെ കുറിച്ചുള്ള നിരൂപണ ഗ്രന്ഥമായ വാൾ തിളക്കമുള്ള വാക്കിന്റെ പ്രകാശനം ഏഴാച്ചേരി രാമചന്ദ്രൻ, ഡോ. വള്ളിക്കാവ് മോഹൻദാസിനു നൽകി പ്രകാശനം ചെയ്തു. താലൂക്ക് ലൈബ്രറി കൗൺസിൽ പ്രസിഡന്റ് അഡ്വ. പി.ബി. ശിവൻ, കെ.എസ്. പിള്ളയെ പൊന്നാട അണിയിച്ച് ആദരിച്ചു. താലൂക്കിലെ ഗ്രന്ഥശാലാ പ്രവർത്തകർ ചവറ കെ. എസ്. പിള്ളയ്ക്ക് പുസ്തകങ്ങൾ നൽകി. ഈ പുസ്തകങ്ങൾ താലൂക്കാശുപത്രിയിലെ രോഗികൾക്കും കൂട്ടിരിപ്പുകാർക്കുമായി താലൂക്ക് ലൈബ്രറി കൗൺസിൽ ഒരുക്കുന്ന ലൈബ്രറിയിലേക്ക് ആശുപത്രി ആർ. എം. ഒ ഡോ. അനൂപ് കൃഷ്ണൻ, കെ. എസ്. പിള്ളയിൽ നിന്ന് ഏറ്റുവാങ്ങി. വി.പി. ജയപ്രകാശ് മേനോൻ , പ്ലാവേലിൽ എസ്. രാമകൃഷ്ണപിള്ള, ആർ.കെ. ദീപ, വി. വിജയകുമാർ എന്നിവർ സംസാരിച്ചു. യോഗത്തിന് മുന്നോടിയായി നടന്ന കവി അരങ്ങ് ഇഞ്ചക്കാട് ബാലചന്ദ്രൻ ഉദ്ഘാടനം ചെയ്തു. മൈനാഗപ്പള്ളി ശ്രീരംഗൻ അദ്ധ്യക്ഷത വഹിച്ചു.