കൊല്ലം: രാജ്യം കടുത്ത സാമ്പത്തിക മാന്ദ്യം നേരിടുമ്പോൾ കേരളത്തിലെ വികസന പ്രവർത്തനങ്ങൾ സഹകരണ പ്രസ്ഥാനത്തിന്റെ കരുത്തിലാണ് തടസമില്ലാതെ തുടരുന്നതെന്ന് മന്ത്റി ജെ. മേഴ്‌സിക്കുട്ടിഅമ്മ പറഞ്ഞു. ജില്ലാ സഹകരണ ബാങ്ക് ആഡിറ്റോറിയത്തിൽ അഖിലേന്ത്യാ സഹകരണ വാരാഘോഷത്തിന്റെ ജില്ലാതല ഉദ്ഘാടനം നിർവഹിക്കുകയായിരുന്നു മന്ത്റി.
നികുതി വിഹിതം കൃത്യമായി നൽകാതെയും കടത്തിന്റെ പരിധി വെട്ടിക്കുറച്ചും സംസ്ഥാനത്തെ ബുദ്ധിമുട്ടിക്കുന്ന സാഹചര്യത്തിലാണ് സഹകരണ പ്രസ്ഥാനം വലിയ പിന്തുണയാകുന്നത്. ജനം ഈ മേഖലയിൽ അർപ്പിക്കുന്ന വിശ്വാസത്തിന് തെളിവാണ് വർദ്ധിച്ചു വരുന്ന നിക്ഷേപം. സഹകരണ മേഖലയിൽ ലഭിക്കുന്ന പണം ക്രിയാത്മകമായി ഉപയോഗപ്പെടുത്തി വികസന പ്രവർത്തനങ്ങൾക്ക് വിനിയോഗിക്കുകയാണ് സർക്കാരിന്റെ ലക്ഷ്യമെന്നും മന്ത്റി പറഞ്ഞു.
സാമൂഹ്യ പ്രതിബദ്ധതയാണ് സഹകരണ മേഖലയുടെ മുഖമുദ്റയെന്ന് വിവിധ പരീക്ഷകളിൽ ഉന്നത വിജയം നേടിയവർക്കുള്ള സമ്മാനം വിതരണം ചെയ്ത് മന്ത്റി കെ. രാജു പറഞ്ഞു. കേരള ബാങ്ക് രൂപീകരണം സഹകരണ പ്രസ്ഥാനത്തെ കൂടുതൽ ശക്തിപ്പെടുത്തുമെന്നും അദ്ദേഹം പറഞ്ഞു.
എം. നൗഷാദ് എം. എൽ. എ അദ്ധ്യക്ഷനായി. എം. എൽ. എമാരായ ആർ. രാമചന്ദ്രൻ, ജി. എസ്. ജയലാൽ, എൻ. എസ്. സഹകരണ ആശുപത്രി പ്രസിഡന്റ് പി. രാജേന്ദ്രൻ, വിവിധ ബാങ്ക് പ്രസിഡന്റുമാർ, സഹകരണ ജോയിന്റ് ഡയറക്ടർ ഡി. പ്രസന്നകുമാരി, സഹകാരികൾ, ബാങ്കുകളിലെ ജീവനക്കാർ തുടങ്ങിയവർ പങ്കെടുത്തു. സമ്മേളനത്തിന് മുന്നോടിയായി സഹകാരികൾ പങ്കെടുത്ത റാലി ക്യു.എ.സി മൈതാനത്ത് നിന്നാരംഭിച്ച് സമ്മേളന സ്ഥലമായ ജില്ലാ സഹകരണ ബാങ്ക് ആഡിറ്റോറിയത്തിൽ സമാപിച്ചു.