# 16 വേദികൾ

# 200 മത്സര ഇനങ്ങൾ

# മാറ്റുരയ്ക്കാൻ ആറായിരത്തോളം പ്രതിഭകൾ

കൊല്ലം: ജില്ലാ സ്കൂൾ കലോത്സവത്തിന് പൂയപ്പള്ളിയിൽ ഇന്ന് തിരിതെളിയും. മൂന്ന് നാൾ നീളുന്ന മത്സരങ്ങൾ പൂയപ്പള്ളി ഗവ.എച്ച്.എസ്.എസ് കേന്ദ്രീകരിച്ചുള്ള 16 വേദികളിലായാണ്. രാവിലെ 9 ന് മന്ത്രി ജെ. മേഴ്സിക്കുട്ടിഅമ്മ ഉദ്ഘാടനം ചെയ്യും.

യു.പി, എച്ച്.എസ്, എച്ച്.എസ്.എസ്, വി.എച്ച്.എസ്.ഇ വിഭാഗങ്ങളിലായി 200 ഇനങ്ങളിൽ ആറായിരത്തോളം പ്രതിഭകൾ മാറ്റുരയ്ക്കും. മൈലോട് ടി.ഇ.എം.വി.എച്ച്.എസ്.എസ്, മാർത്തോമ്മ പാരിഷ് ഹാൾ, വെളിയം മർവ ആഡിറ്റോറിയം എന്നിവിടങ്ങളിലാണ് മറ്റു വേദികൾ. പ്രധാനവേദിക്ക് സമീപമുള്ള ഡൂബി ആഡിറ്റോറിയത്തിലാണ് ഭക്ഷണശാല. മൂന്ന് നേരവും വിഭവ സമൃദ്ധമായ ഭക്ഷണമുണ്ട്.

ദേശീയ അദ്ധ്യാപക അവാർഡ് ജേതാവ് രാജൻ കോസ്മിക് ചിട്ടപ്പെടുത്തിയ സ്വാഗത ഗാനത്തോടെ തിരശ്ശീല ഉയരും. മറ്റൊരു ദേശീയ അദ്ധ്യാപക അവാർഡ് ജേതാവ് ടി.വി. പ്രസന്നനാണ് സ്വാഗതഗാനം രചിച്ചത്.

ഉദ്ഘാടന സമ്മേളനത്തിൽ ജി.എസ്. ജയലാൽ എം.എൽ.എ അദ്ധ്യക്ഷത വഹിക്കും. കലാമത്സരങ്ങൾ മന്ത്രി കെ.രാജു ഉദ്ഘാടനം ചെയ്യും. എൻ.കെ പ്രേമചന്ദ്രൻ എം.പി മുഖ്യപ്രഭാഷണം നടത്തും. എം.പിമാരായ കെ.സോമപ്രസാദ് , കൊടിക്കുന്നിൽ സുരേഷ്, എം.എൽ.എമാരായ പി. ഐഷാ പോറ്രി, കെ.ബി ഗണേശ് കുമാർ, കോവൂർ കുഞ്ഞുമോൻ, എം.മുകേഷ്, എം.നൗഷാദ്, ജില്ലാ പഞ്ചായത്ത് പ്രസിഡന്റ് സി.രാധാമണി, ജില്ലാ കളക്ടർ ബി.അബ്ദുൾ നാസർ എന്നിവർ പങ്കെടുക്കും. ഉദ്ഘാടന ചടങ്ങിനുശേഷം പ്രധാനവേദിയിൽ കേരളനടനം മത്സരം ആരംഭിക്കും.

21 ന് വൈകിട്ട് സമാപന സമ്മേളനം പി. ഐഷാ പോറ്റി എം.എൽ.എ ഉദ്ഘാടനം ചെയ്യും. പൂയപ്പള്ളി ഗ്രാമപഞ്ചായത്ത് പ്രസിഡന്റ് ഹംസ റാവുത്തർ അദ്ധ്യക്ഷത വഹിക്കും. എം.എൽ.എമാരായ മുല്ലക്കര രത്നാകരൻ, ആർ.രാമചന്ദ്രൻ, എൻ.വിജയൻപിള്ള, ജില്ലാ പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ശ്രീലേഖ വേണുഗോപാൽ തുടങ്ങിയവർ സംസാരിക്കും.