കരുനാഗപ്പള്ളി : പള്ളിക്കലാറിന്റെ നഷ്ടപ്പെട്ട പ്രതാപം മടക്കികൊണ്ടുവരുന്നതിന്റെ ഭാഗമായി കേരള യൂത്ത് പ്രമോഷൻ കൗൺസിൽ, പള്ളിക്കലാർ സംരക്ഷണ സമിതി എന്നീ സംഘടനകളുടെ നേതൃത്വത്തിൽ ക്ലീൻ പള്ളിക്കലാർ ചലഞ്ചിന്റെ രണ്ടാം ഘട്ടം ആരംഭിച്ചു. രണ്ടാംഘട്ടത്തിന്റെ ഭാഗമായുള്ള കണ്ടൽ വനവൽക്കരണ പരിപാടിക്ക് തുടക്കമായി. ജോൺ എഫ്. കെന്നഡി മെമ്മോറിയൽ വൊക്കേഷണൽ ഹയർസെക്കൻഡറി സ്‌കൂളിലെ പരിസ്ഥിതി ക്ലബിലെ വിദ്യാർത്ഥികളും അദ്ധ്യാപകരും പി.ടി.എ ഭാരവാഹികളും സന്നദ്ധ സംഘടനാ പ്രവർത്തകരും കണ്ടൽ തൈകൾ നടാനായെത്തി. മുന്നൂറ് തൈകളാണ് ആദ്യദിനം കായൽത്തീരത്തു നട്ടത്. പ്രദേശവാസികൾക്ക് കണ്ടലുകളെക്കുറിച്ചുള്ള അവബോധ ക്ലാസും സംഘടിപ്പിച്ചു. കണ്ടൽ വനവൽക്കരണ പരിപാടിക്ക് കേരള യൂത്ത് പ്രമോഷൻ കൗൺസിൽ ചെയർമാൻ സുമൻജിത്ത് മിഷ, പള്ളിക്കലാർ സംരക്ഷണ സമിതി സെക്രട്ടറി ജി മഞ്‍ജുക്കുട്ടൻ, പി.ടി.എ പ്രസിഡന്റ് ലാൽജി പ്രസാദ്, അദ്ധ്യാപകരായ സുധീർ, ഹാഫിസ്, മുനീർ, നിഥിൻ എന്നിവർ നേതൃത്വം നൽകി.