കൊല്ലം: ദേശീയ നാഗരിക - ഗ്രാമീണ തൊഴിലുറപ്പ് തൊഴിലാളി യൂണിയന്റെ (എൻ.യു.ആർ.ഇ.ജി.എസ് - യു.ടി.യു.സി ) ആഭിമുഖ്യത്തിൽ ഇന്ന് ജില്ലയിലെ തൊഴിലുറപ്പ് തൊഴിലാളികൾ എൻ.കെ. പ്രേമചന്ദ്രൻ എം.പിയുടെ നേതൃത്വത്തിൽ ഹെഡ് പോസ്റ്റ് ഓഫീസ് ഉപരോധിക്കുമെന്ന് എൻ.യു.ആർ.ഇ.ജി.എസ് - യു.ടി.യു.സി ജില്ലാ സെക്രട്ടറി വെളിയം ഉദയകുമാർ വാർത്താ സമ്മേളനത്തിൽ അറിയിച്ചു.

തൊഴിലാളികളുടെ കൂലി കുടിശിക ഉടൻ നൽകുക, കൂലിവർദ്ധനവ് നടപ്പാക്കുക, തൊഴിൽ സുരക്ഷിതത്വം ഉറപ്പുവരുത്തുക തുടങ്ങിയ ആവശ്യങ്ങൾ ഉന്നയിച്ചാണ് ഉപരോധം. ആർ.എസ്.പി സംസ്ഥാന സെക്രട്ടറി എ.എ.അസീസ് ഉദ്ഘാടനം ചെയ്യും. കേന്ദ്ര - സംസ്ഥാന സർക്കാരുകൾക്കെതിരെയുള്ള കുറ്റപത്ര സമർപ്പണം ആർ.എസ്.പി കേന്ദ്ര സെക്രട്ടേറിയേറ്റ് അംഗം ഷിബു ബേബിജോൺ നിർവഹിക്കും. യു.ടി.യു.സി സംസ്ഥാന പ്രസിഡന്റ് ബാബു ദിവാകരൻ, ജില്ലാ പ്രസിഡന്റ് ടി.സി. വിജയൻ, ആർ.എസ്.പിയുടെയും യു.ടി.യു.സിയുടെയും ദേശീയ,​ സംസ്ഥാന,​ ജില്ലാ നേതാക്കൾ പങ്കെടുക്കും. ആർ.എസ്.പി ജില്ലാ സെക്രട്ടറി കെ.എസ്. വേണുഗോപാൽ, യൂണിയൻ ജില്ലാ പ്രസിഡന്റ് കെ. രാജി, പ്ലാക്കാട് ടിങ്കു എന്നിവരും വാർത്താ സമ്മേളനത്തിൽ പങ്കെടുത്തു.