തൃശൂർ: കൗമാര ശാസ്ത്രപ്രതിഭകളെ കണ്ടെത്താൻ പൊതുവിദ്യാഭ്യാസ വകുപ്പ് നടത്തുന്ന സംസ്ഥാന സ്‌കൂൾ ശാസ്‌ത്രോത്സവം ഇന്ന് കുന്നംകുളത്ത് ആരംഭിക്കും. മൂന്ന് ദിവസം നീളുന്ന ശാസ്‌ത്രോത്സവത്തിൽ 350 ഓളം ഇനങ്ങളിലായി 12,000 പ്രതിഭകൾ മാറ്റുരയ്ക്കും. പൂർണമായും ഹരിത ചട്ടം പാലിച്ച് നടത്തുന്ന ശാസ്‌ത്രോത്സവം അഞ്ചിന് സമാപിക്കും.

ശാസ്ത്ര, സാമൂഹിക ശാസ്ത്ര, ഗണിതശാസ്ത്ര, ഐ.ടി പ്രവൃത്തിപരിചയ മേളകളാണ് നടക്കുക. ഇന്ന് രാവിലെ 9 ന് കുന്നംകുളം നഗരസഭ ടൗൺഹാളിൽ പൊതുവിദ്യാഭ്യാസ ഡയറക്ടർ കെ. ജീവൻ ബാബു പതാക ഉയർത്തും. 9.30 ന് അതേവേദിയിൽ തദ്ദേശമന്ത്രി എ. സി മൊയ്തീൻ ഉദ്ഘാടനം നിർവഹിക്കും. കൃഷിമന്ത്രി വി.എസ്. സുനിൽകുമാർ അദ്ധ്യക്ഷത വഹിക്കും. മന്ത്രി പ്രൊഫ. സി. രവീന്ദ്രനാഥ് മുഖ്യപ്രഭാഷണം നടത്തും.

രാവിലെ 10 മുതൽ എല്ലാ വേദികളിലും മത്സരം ആരംഭിക്കും. ഉച്ചയ്ക്ക് രണ്ടുമുതൽ പ്രദർശനങ്ങളും ഉണ്ടാകും. കുന്നംകുളം നഗരസഭ ടൗൺഹാളിൽ വൊക്കേഷണൽ എക്‌സ്‌പോ, കരിയർ ഫെസ്റ്റ്, കരിയർ സെമിനാർ എന്നിവ സംഘടിപ്പിക്കും. എക്‌സ്‌പോ പ്രദർശനത്തോടൊപ്പം വിപണനവും ഉണ്ടാകും.

അഞ്ചിന് വൈകിട്ട് നാലിന് നഗരസഭ ടൗൺഹാളിൽ രമ്യ ഹരിദാസ് എം.പി സമാപന സമ്മേളനം ഉദ്ഘാടനം ചെയ്യും. ബെന്നി ബെഹന്നാൻ എം.പി സമ്മാനദാനം നിർവഹിക്കും. കോർപറേഷൻ മേയർ അജിത വിജയൻ ശാസ്‌ത്രോത്സവ രേഖ പ്രകാശനം ചെയ്യും.

5 വേദികൾ

കുന്നംകുളം ഗവ. മോഡൽ ബോയ്‌സ് ഹയർ സെക്കൻഡറി സ്‌കൂൾ

ബഥനി ഇംഗ്ലീഷ് മീഡിയം എച്ച്.എസ്.എസ്

പെരുമ്പിലാവ് ടി.എം.വി.എച്ച്.എസ്.എസ്

ചിറമനേങ്ങാട് കോൺകോഡ് ഇംഗ്ലീഷ് മീഡിയം എച്ച്.എസ്.എസ്

കുന്നംകുളം ബി.സി.ജി.എച്ച്.എസ്.എസ്