തൃശൂർ: യാത്രക്കാരെ വലച്ച് തൃശൂർ- പാലക്കാട് റൂട്ടിലെ ബസ് സമരം രണ്ടാം ദിനവും പൂർണം. സമരം അവസാനിപ്പിക്കാൻ ജില്ല കളക്ടർ ഇന്ന് ബസ് ജീവനക്കാരുടെ സംഘടനകളുമായി ചർച്ച നടത്തും. കുതിരാനിൽ റോഡുപണി ഇപ്പോഴും ആരംഭിച്ചിട്ടില്ലാത്ത സാഹചര്യത്തിൽ ബസുകൾ സർവീസ് നടത്താൻ തയ്യാറല്ലെന്നാണ് സൂചന. വർഷം കഴിയാതെ കാര്യമായ പണികളൊന്നും കുതിരാനിൽ സാദ്ധ്യമല്ലെന്നും പറയുന്നു. മഴക്കാലത്ത് ഉപയോഗിക്കാവുന്ന ടാർ ഉപയോഗിച്ച് ടാറിംഗ് നടത്തണമെന്ന ആവശ്യവും ഉയർന്നിട്ടുണ്ട്. തൃശൂർ പാലക്കാട് റൂട്ടിൽ കെ.എസ്.ആർ.ടി.സി സർവീസുകൾ നടത്തുന്നുണ്ടെങ്കിലും യാത്രാ ക്ലേശത്തിന് അത് വേണ്ടത്ര പരിഹാരമാകുന്നില്ലെന്ന് പരാതിയുണ്ട്. തൃശൂർ ഷൊർണൂർ റൂട്ടിലെ സ്വകാര്യ ബസുകളിലും തിരക്കനുഭവപ്പെടുന്നുണ്ട്. സ്വകാര്യ ബസുകൾ ഇല്ലെങ്കിലും കുതിരാനിൽ ഗതാഗതക്കുരുക്കിന് കുറവില്ല.