തൃശൂർ: സംസ്ഥാന സ്‌കൂൾ ശാസ്‌ത്രോത്സവത്തിന് ഇന്ന് തിരശീല വീഴാനിരിക്കെ ഓവറാൾ കിരീടത്തിനുള്ള മത്സരം ഫോട്ടോ ഫിനിഷിലേക്ക്. രണ്ടാം ദിനത്തിൽ ഒന്നാം സ്ഥാനം മാറി മറിഞ്ഞ് ഒടുവിൽ പാലക്കാട് ജില്ല 1, 284 പോയിന്റുമായി മുന്നിലെത്തി. അദ്യദിനത്തിൽ ഒന്നാം സ്ഥാനത്തുണ്ടായിരുന്ന മലപ്പുറം നാലാം സ്ഥാനത്തേക്ക് വീണു.

കോഴിക്കോട് 1,277 പോയിന്റോടെ രണ്ടാം സ്ഥാനത്തുണ്ട്. 1,269 പോയിന്റുള്ള കണ്ണൂരാണ് മൂന്നാമത്. മലപ്പുറത്തിന് 1,235 പോയിന്റാണുള്ളത്. ആതിഥേയരായ തൃശൂർ 1,187 പോയിന്റുമായി അഞ്ചാം സ്ഥാനത്താണ്. ശാസ്ത്രത്തിൽ 109 പോയിന്റുമായി കണ്ണൂരാണ് മുന്നിൽ. 98 പോയിന്റോടെ കോഴിക്കോട് രണ്ടാം സ്ഥാനത്തും, 96 പോയിന്റോടെ പാലക്കാട് മൂന്നാമതുമാണ്. ഗണിത ശാസ്ത്രത്തിൽ 254 പോയിന്റുമായി മലപ്പുറമാണ് മുന്നിൽ. 248 പോയിന്റുമായി കോഴിക്കോട് രണ്ടാം സ്ഥാനത്തും 247 പോയിന്റുമായി പാലക്കാട് മൂന്നാം സ്ഥാനത്തുമുണ്ട്. സാമൂഹിക ശാസ്ത്ര വിഭാഗത്തിൽ 115 പോയിന്റുമായി കണ്ണൂരാണ് മുന്നിൽ.

105 പോയിന്റോടെ പാലക്കാട് രണ്ടാമതും 104 പോയിന്റോടെ മലപ്പുറം മൂന്നാമതുമാണ്. ഐ.ടിയിൽ 89 പോയിന്റോടെ പാലക്കാടാണ് ഒന്നാമത്. 85 പോയിന്റുമായി മലപ്പുറം രണ്ടാമതും 83 പോയിന്റോടെ എറണാകുളം മൂന്നാമതുമുണ്ട്.

സ്‌കൂളുകളിൽ 130 പോയിന്റുമായി ആലത്തൂർ ബി.എസ്.എസ് ഗുരുകുലം ഹയർ സെക്കൻഡറി സ്‌കൂളാണ് ഒന്നാമത്. മേമുണ്ട എച്ച്.എസ്.എസ് 108 പോയിന്റോടെ രണ്ടാം സ്ഥാനത്തും, എസ്.എച്ച്.എച്ച്.എസ്.എസ് ദ്വാരക 106 പോയിന്റുമായി മൂന്നാം സ്ഥാനത്തുമുണ്ട്.