ചാവക്കാട്: കോൺക്രീറ്റ് കട്ട വിരിക്കലും മറ്റു അറ്റകുറ്റപ്പണികളും പൂത്തിയായതോടെ ചാവക്കാട് ചേറ്റുവ റോഡ് ഇന്ന് രാവിലെ ഒമ്പതിന് തുറന്നുകൊടുക്കുമെന്ന് കെ.വി. അബ്ദുൾ ഖാദർ എം.എൽ.എ അറിയിച്ചു. എം.എൽ.എയുടെ ആസ്തി വികസന ഫണ്ട് ഉപയോഗിച്ചാണ് ഒരുമനയൂർ പെട്രോൾ പമ്പിന് മുന്നിൽ നിന്നും കരുവാരകുണ്ട് വരെ കോൺക്രീറ്റ് കട്ടകൾ വിരിച്ചത്‌. റോഡ് നിർമ്മാണം ആരംഭിച്ചതോടെ ഇതുവഴിയുള്ള ഗതാഗതം നിരോധിച്ചിരുന്നു. തുടർന്ന് മൂന്നാംകല്ല് അഞ്ചങ്ങാടി ബ്ലാങ്ങാട് വഴിയാണ് ഗതാഗതം വഴിതിരിച്ചു വിട്ടത്. ചേറ്റുവ മുതൽ മണത്തല വരെയും എടക്കഴിയൂർ മുതൽ കാപ്പിരിക്കാട് വരെയും ആധുനിക രീതിയിലുള്ള റോഡ് നിർമ്മാണത്തിന് 10.5 കോടി രൂപ അനുവദിച്ചതായി കെ.വി. അബ്ദുൽ ഖാദർ എം.എൽ.എ കഴിഞ്ഞ ദിവസം അറിയിച്ചിരുന്നു. മണത്തല മുതൽ എടക്കഴിയൂർ വരെയുള്ള നിർമ്മാണത്തിന് ഒരു വർഷം മുൻപ് തന്നെ ടെൻഡർ ആയിട്ടുണ്ട്.