ഗുരുവായൂർ: കൗമാരകലയുടെ മാമാങ്കത്തിന് ക്ഷേത്ര നഗരിയിൽ തുടക്കം. രാവിലെ 9.30 ഓടെ ശ്രീകൃഷ്ണ ഹൈസ്കൂളിൽ വിദ്യാഭ്യാസ ഉപഡയറക്ടർ എൻ. ഗീത പതാക ഉയർത്തിയതോടെയാണ് നാല് ദിവസം നീളുന്ന കലോത്സവത്തിന് തുടക്കമായത്. തുടർന്ന് നടന്ന സമ്മേളനത്തിൽ ജില്ലാ പഞ്ചായത്ത് പ്രസിഡന്റ് മേരി തോമസ് ഉദ്ഘാടനം നിർവഹിച്ചു. ഗുരുവായൂർ നഗരസഭാ ചെയർപേഴ്‌സൺ വി.എസ്. രേവതി അദ്ധ്യക്ഷയായി. നടൻ വി.കെ. ശ്രീരാമൻ കലോത്സവ സന്ദേശം നൽകി. സംവിധായകൻ കലവൂർ രവികുമാർ വിശിഷ്ടാതിഥിയായി. ജില്ലാ പഞ്ചായത്ത് വൈസ് പ്രസിഡന്റ് എൻ.കെ. ഉദയപ്രകാശ്, ചാവക്കാട് നഗരസഭാ ചെയർമാൻ എൻ.കെ. അക്ബർ, ബ്ലോക്ക് പഞ്ചായത്ത് പ്രസിഡന്റ് സി. മുസ്താഖ് അലി, ഗുരുവായൂർ നഗരസഭ സ്റ്റാൻഡിംഗ് കമ്മിറ്റി ചെയർപേഴ്‌സൺ എം. രതി, ചാവക്കാട് നഗരസഭാ സ്റ്റാൻഡിംഗ് കമ്മിറ്റി ചെയർമാൻ എ.സി. ആനന്ദൻ, വിദ്യാഭ്യാസ ഉപഡയറക്ടർ എൻ. ഗീത, എ.യു. വൈശാഖ് എന്നിവർ സംസാരിച്ചു.
സ്‌റ്റേജിതര ഇനങ്ങളിലും സ്‌റ്റേജിനങ്ങളിലുമായി 28 വേദികളിലാണ് ആദ്യ ദിനത്തിൽ മത്സരങ്ങൾ നടന്നത്. ശ്രീകൃഷ്ണ ഹയർ സെക്കൻഡറി സ്കൂൾ, ചാവക്കാട് ഗവ. ഹയർ സെക്കൻഡറി സ്കൂൾ, മമ്മിയൂർ എൽ.എഫ് ഹയർ സെക്കൻഡറി സ്കൂൾ, ഗുരുവായൂർ ഗവ. യു.പി സ്കൂൾ, മുതുവട്ടൂർ ശിക്ഷക് സദൻ എന്നിവിടങ്ങളിലായി 14 വേദികളിലായാണ് കലോത്സവം നടക്കുന്നത്. ഹയർ സെക്കൻഡറി, വൊക്കേഷണൽ ഹയർ സെക്കൻഡറി വിഭാഗങ്ങളിലായി 105 വിഭാഗങ്ങളിലും, ഹൈസ്കൂൾ വിഭാഗത്തിൽ 95 ഇനങ്ങളിലും യു.പി വിഭാഗത്തിൽ 38 ഇനങ്ങളിലുമാണ് മത്സരങ്ങൾ നടക്കുന്നത്. സംസ്‌കൃതോത്സവത്തിൽ യു.പി, ഹൈസ്കൂൾ വിഭാഗങ്ങളിൽ 19 ഇനങ്ങളുമാണ് ഉള്ളത്. അറബിക് കലോത്സവത്തിൽ യു.പി വിഭാഗത്തിൽ 13 ഇനങ്ങളും ഹൈസ്കൂൾ വിഭാഗത്തിൽ 19 ഇനങ്ങളുമാണുള്ളത്. ജില്ലയിലെ 12 ഉപജില്ലകളിൽ നിന്നായി നാലായിരത്തിലധികം വിദ്യാർത്ഥികളാണ് മത്സരങ്ങളിൽ പങ്കെടുക്കുന്നത്.
കലോത്സവത്തിന് വെള്ളിയാഴ്ച സമാപനമാകും. വെള്ളിയാഴ്ച വൈകീട്ട് അഞ്ചിന് നടക്കുന്ന സമാപന സമ്മേളനം വിദ്യാഭ്യാസ മന്ത്രി പ്രൊഫ. സി. രവീന്ദ്രനാഥ് ഉദ്ഘാടനം ചെയ്യും. ചീഫ് വിപ്പ് അഡ്വ. കെ. രാജൻ വിജയികൾക്ക് സമ്മാനങ്ങൾ വിതരണം ചെയ്യും. കെ.വി. അബ്ദുൾ ഖാദർ എം.എൽ.എ അദ്ധ്യക്ഷനാകും.