തൃശൂർ: തേക്കിൻകാട് മൈതാനിയിൽ മുന്നൂറ് ആനകളെ അണിനിരത്തി ഗജോത്സവം നടത്തുമെന്ന് ദേവസ്വം മന്ത്രി കടകംപിള്ളി സുരേന്ദ്രൻ പറഞ്ഞു. കേരള എലിഫന്റ് ഓണേഴ്‌സ് ഫെഡറേഷൻ 13ാം സംസ്ഥാന സമ്മേളനം കൗസ്തുഭം ഓഡിറ്റോറിയത്തിൽ ഉദ്ഘാടനം ചെയ്യുകയായിരുന്നു മന്ത്രി.

ടൂറിസം വകുപ്പിന്റെ നേതൃത്വത്തിലാകും ഗജോത്സവം. ഇതു സംബന്ധിച്ച സുരക്ഷാ ക്രമീകരണങ്ങൾ ചർച്ച ചെയ്ത ശേഷം മാത്രമാകും അന്തിമതീരുമാനം. ഒന്നോ രണ്ടോ സംഭവങ്ങൾ ചൂണ്ടിക്കാട്ടി ആന എഴുന്നള്ളിപ്പുകളെ അടച്ചാക്ഷേപിക്കുന്നത് ശരിയല്ല. ഉത്സവ സംസ്‌കാരം നിലനിൽക്കണം. ചട്ടങ്ങളും നിയമങ്ങളും ആനകളുടെ പരിപാലനത്തിനായാണ്. അതിനുള്ളിൽ നിന്നുകൊണ്ട് ആനകളെ എഴുന്നള്ളിക്കാനുള്ള സാഹചര്യമുണ്ടാകണം. കഴിഞ്ഞ തൃശൂർ പൂരത്തിന് തെച്ചിക്കോട്ടുകാവ് രാമചന്ദ്രന്റെ എഴുന്നള്ളിപ്പുമായി ബന്ധപ്പെട്ട വിഷയം വകുപ്പുകൾ തമ്മിലുള്ള ഏകോപനമില്ലായ്മ കാരണമായിരുന്നു. ഗജോത്സവത്തിന് ആനകളെ സൗജന്യമായി വിട്ടുനൽകുമെന്ന് ചടങ്ങിൽ അദ്ധ്യക്ഷത വഹിച്ച ഫെഡറേഷൻ സംസ്ഥാന പ്രസിഡന്റ് കെ.ബി ഗണേഷ്‌കുമാർ എം.എൽ.എ പറഞ്ഞു.
മേയർ അജിത വിജയൻ വിശിഷ്ടാതിഥിയായി. കേരളത്തിലെ ഏറ്റവും മുതിർന്ന ആനചികിത്സകർക്ക് നൽകുന്ന ഐരാവത ഭിഷഗ്വര ശ്രേഷ്ഠ പുരസ്‌കാരം ഡോ.കെ.സി.പണിക്കർക്കും മാതംഗ ജീവതവര്യ പുരസ്‌കാരം ആവണപ്പറമ്പ് മഹേശ്വരൻ നമ്പൂതിരിപ്പാടിനും സമ്മാനിച്ചു. കേരളത്തിലെ ഏറ്റവും നല്ല ആനപാപ്പാനുള്ള ഡേവിസേട്ടൻ സ്മാരക ഗജമിത്ര പുരസ്‌കാരം മണി എരിമയൂരിന് സമ്മാനിച്ചു. ഗജരാജൻ ഗുരുവായൂർ കേശവന്റെ പാപ്പാൻ മൂക്കുതല നാരായണൻ നായരെ ഡോ. ടി.എ. സുന്ദർമേനോൻ ആദരിച്ചു. ആനകളിൽ നിന്നും അപകടം സംഭവിച്ച് ചികിത്സയിൽ കഴിയുന്ന പാപ്പാന്മാർക്കുള്ള സഹായവിതരണം, അവശത അനുഭവിക്കുന്ന ആനത്തൊഴിലാളികൾക്കുള്ള ധനസഹായവിതരണം, കേരളത്തിലെ മുതിർന്ന ആന ഉടമകളെ ആദരിക്കൽ, ആനപ്രേമി സംഘടനകളെ ആദരിക്കൽ, മേളപ്രമാണിമാരായ കിഴക്കൂട്ട് അനിയൻമാരാരെയും കേളത്ത് അരവിന്ദാക്ഷൻ മാരാരെയും ആദരിക്കൽ, പ്രകൃതി ദുരന്തങ്ങളിൽ രക്ഷാപ്രവർത്തനം നടത്തിയ എലിഫന്റ് സ്‌ക്വാഡ് അംഗങ്ങളെ ആദരിക്കൽ, മുതിർന്ന ആന ഡെക്കറേഷൻ ഏജന്റിനെയും ആനതൊഴിലാളികളെയും ആദരിക്കൽ, ആന ഉടമകൾക്കുള്ള തിരിച്ചറിയൽ കാർഡ് വിതരണം എന്നിവയും നടന്നു. കിഴക്കൂട്ട് അനിയൻമാരാരും കേളത്ത് അരവിന്ദാക്ഷൻ മാരാരും നയിച്ച പാണ്ടിമേളവുമുണ്ടായി.
ഗുരുവായൂർ ദേവസ്വം ബോർഡ് ചെയർമാൻ കെ.ബി മോഹൻദാസ്, മുൻ എം.എൽ.എ ബാബു എം. പാലിശേരി, കൂടൽമാണിക്യം ദേവസ്വം ചെയർമാൻ പ്രദീപ് യു. മേനോൻ, കൗൺസിലർമാരായ എം.എസ്. സമ്പൂർണ, കെ. മഹേഷ്, ഡോ. പി.ബി. ഗിരിദാസ്, പ്രൊഫ. എം. മാധവൻകുട്ടി, ജി. രാജേഷ് പൊതുവാൾ, ഡോ. ടി.എ. സുന്ദർമേനോൻ, ഫെഡറേഷൻ സെക്രട്ടറി പി. ശശികുമാർ തുടങ്ങിയവർ പങ്കെടുത്തു.