നാവികർക്കിടയിൽ പ്രചാരമുള്ള കഥയാണ് 'ഫ്ലൈയിംഗ് ഡച്ച്മാൻ ' എന്ന പ്രേതക്കപ്പലിന്റേത്. ശാപം കിട്ടിയ ഫ്ലൈയിംഗ് ഡച്ച്മാൻ എന്ന കപ്പൽ യഥാർത്ഥമാണോ? കടലിൽ മരീചിക പോലുള്ള ഒപ്ടിക്കൽ ഇല്യൂഷനെയാണ് ഫ്ലൈയിംഗ് ഡച്ച്മാൻ എന്ന കപ്പലായി പണ്ടുകാലത്തെ നാവികർ തെറ്റിദ്ധരിച്ചതെന്ന് ഗവേഷകർ ചൂണ്ടിക്കാട്ടുന്നുണ്ട്. അതേസമയം, ഇത് യഥാർത്ഥത്തിൽ ഉണ്ടെന്ന് വിശ്വസിച്ചവർ നിരവധിയാണ്. ഇംഗ്ലണ്ടിലെ ജോർജ് അഞ്ചാമൻ രാജാവും ഇക്കൂട്ടത്തിൽപ്പെടുന്നു.

ഡച്ച് ഈസ്‌റ്റ് ഇന്ത്യാ കമ്പനിയുടെ സുവർണ കാലഘട്ടമായിരുന്ന 17ാം നൂറ്റാണ്ടിലാണ് ഫ്ലൈയിംഗ് ഡച്ച്മാനെപ്പറ്റിയുള്ള കഥകൾ ആരംഭിക്കുന്നത്. ചുറ്റും ചുവന്ന അസാധാരണ പ്രകാശത്തോട് കൂടി ഒരു കപ്പൽ കടലിൽ അലയുന്നതായി പല നാവികരും കണ്ടിട്ടുണ്ടത്രെ. ചിലപ്പോൾ അസാധാരണ വേഗതയിൽ ആ കപ്പൽ തങ്ങൾക്ക് നേരെ പാഞ്ഞടുത്തതായും നാവികർ വെളിപ്പെടുത്തി. ഈ പ്രേതക്കപ്പൽ ഫ്ലൈയിംഗ് ഡച്ച്മാൻ എന്ന പേരിൽ അറിയപ്പെടാൻ തുടങ്ങി. 1880ൽ ഓസ്ട്രേലിയൻ തീരത്ത് മെൽബണിനും സിഡ്നിയ്‌ക്കും മദ്ധ്യേ വച്ച് ഇംഗ്ലണ്ടിലെ ജോർജ് അഞ്ചാമനും സഹോദരൻ ആൽബർട്ട് വിക്‌ടർ രാജകുമാരനും ഈ പ്രേതക്കപ്പലിനെ കണ്ടതായി പറഞ്ഞിട്ടുണ്ട്.

ഫ്ലൈയിംഗ് ഡച്ച്മാന്റെ ഉത്ഭവത്തെ പറ്റി നിരവധി കഥകളാണ് പ്രചാരത്തിലുള്ളത്. 1641ൽ മുങ്ങിയ കപ്പലാണ് ഫ്ലൈയിംഗ് ഡച്ച്മാനെന്നും ഹെൻറിക് വാൻ ഡെർ ഡെക്കൻ എന്നയാളായിരുന്നു അതിന്റെ ക്യാപ്ടൻ എന്നും പറയപ്പെടുന്നു. ക്യാപ്ടൻ ഹെൻറിക് ഹോളണ്ടിൽ നിന്നും ഈസ്‌റ്റ് ഇൻഡീസിലേക്ക് യാത്ര തുടങ്ങി. അങ്ങനെയിരിക്കെ ആഫ്രിക്കയിലെ ഗുഡ്ഹോപ്പ് മുനമ്പിലെത്തി. അവിടെ ശക്തമായ കാറ്റിൽപ്പെട്ട് പിന്മാറാൻ തയാറാകാതെ ക്യാപ്ടൻ ദൈവത്തെ വെല്ലുവിളിച്ചു. അങ്ങനെ ക്യാപ്ടനെയും കപ്പലിനെയും ദൈവം ശപിക്കുകയായിരുന്നത്രെ.

17ാം നൂറ്റാണ്ടിൽ ജീവിച്ചിരുന്ന ബെർണാഡ് ഫോക്ക് ആയിരുന്നു ഫ്ലൈയിംഗ് ഡച്ച്മാന്റെ ക്യാപ്ടൻ എന്നും കഥകളുണ്ട്. കപ്പൽ ഓടിക്കുന്നതിലെ അസാമാന്യ വേഗതയുടെ പേരിൽ ബെർണാഡ് ഏറെ ശ്രദ്ധിക്കപ്പെട്ടിരുന്നു. അസാധാരണ വേഗതയിൽ സഞ്ചരിക്കാൻ ക്യാപ്ടനെ സഹായിച്ചിരുന്നത് ചെകുത്താൻ ആയിരുന്നത്രെ. എന്നാൽ ചെകുത്താനുമായി പന്തയം വച്ചതിനെ തുടർന്ന് ബെർണാഡ് ശാപമേറ്റു വാങ്ങുകയായിരുന്നു. രണ്ട് കഥകളിലും ഫ്ലൈയിംഗ് ഡച്ച്മാന് ലഭിച്ചെന്ന് പറയുന്ന ശാപം ലോകാവസാനം വരെ തീരം തൊടാതെ കടലിൽ അലയുമെന്നാണ്.

ഏതായാലും ഗതികിട്ടാതെ കടലിൽ അലയുന്ന ഫ്ലൈയിംഗ് ഡച്ച്മാൻ പ്രേതക്കപ്പലിനെ കണ്ടാൽ അപകടമാണെന്നാണ് നാവികർ വിശ്വസിച്ചിരുന്നത്. പൈറേറ്റ്സ് ഒഫ് ദ കരീബിയൻ പരമ്പരയിലെ 'ഡെഡ് മാൻസ് ചെസ്‌റ്റ് ' ഉൾപ്പെടെയുള്ള ചിത്രങ്ങളിൽ ഫ്ലൈയിംഗ് ഡച്ച്മാനെ കാണാനാകും.