എന്ത് കഴിക്കുന്നു എന്നതിനെ ആശ്രയിച്ചാണ് രോഗവും ആരോഗ്യവും ഉണ്ടാകുന്നത്. വല്ലപ്പോഴും കഴിക്കുന്നത് വലിയ കുഴപ്പമോ,വളരെ നല്ലതോ ആകാറില്ല.
ഭക്ഷണം ശരീരത്തിന് ആവശ്യമായ സൂക്ഷ്മ മൂലകങ്ങൾ ഉൾപ്പെടെയുള്ളവയെ നൽകും. പഴം, പച്ചക്കറികൾ, ഇലക്കറികൾ തുടങ്ങിയവയും പല തരത്തിലുള്ളവയാണ് ഉപയോഗിക്കേണ്ടത്. ജ്യൂസ് ആയി ഉപയോഗിക്കുന്നതിനേക്കാൾ ഉപയോഗയോഗ്യമായ ഭാഗം മുഴുവനായി കഴിക്കുന്നതാണ് നല്ലത്.
വളരെക്കുറച്ച് ധാന്യ വിഭാഗങ്ങളാണ് കേരളീയർ കഴിക്കുന്നത്. അരി, ഗോതമ്പ് തുടങ്ങിയവ മാത്രമല്ല കൂവരക്, ചോളം,തിന തുടങ്ങിയവയും ഉപയോഗിക്കണം. കൂവരകിൽ ഇരുമ്പിന്റെ അംശം വളരെ കൂടുതലുള്ളതിനാൽ വിളർച്ച രോഗികൾക്ക് വളരെ നല്ലതാണ്.
പോഷകക്കുറവുള്ളവർക്ക് ഞവര അരി വളരെ ഗുണം ചെയ്യും.തൈര് നിത്യവും ഉപയോഗിക്കേണ്ടതില്ല. മോരും മോരു കറിയും നല്ലതുതന്നെ. പൊതുവേ വീട്ടിൽ തയ്യാറാക്കുന്ന ഭക്ഷണത്തിന് വളരെ പ്രാധാന്യം നൽകണം. പ്രഭാത ഭക്ഷണം കഴിക്കാതെ ശരിയായ ആരോഗ്യം നിലനിർത്താൻ സാധ്യമല്ല. പ്രഭാത ഭക്ഷണം കഴിക്കാൻ തോന്നണമെങ്കിൽ തലേദിവസം രാത്രി കിടക്കുന്നതിന് ഒന്നര മണിക്കൂർ മുമ്പ് കുറഞ്ഞ അളവിൽ എളുപ്പം ദഹിക്കുന്ന ഭക്ഷണം കഴിച്ചിരിക്കണം.സാലഡുകൾ ആഹാരത്തിൽ നിർബന്ധമായും ഉൾപ്പെടുത്തണം. എണ്ണ പലഹാരങ്ങൾക്കും, ബേക്കറി പലഹാരങ്ങൾക്കും, അച്ചാറുകൾക്കും വളരെ ചെറിയ സ്ഥാനമേ നൽകാവൂ .
അലർജി രോഗങ്ങൾ ഇല്ലാത്തവർ കറുത്ത മുന്തിരി, മുന്തിരിജ്യൂസ് എന്നിവയും അലർജി ഉള്ളവർ ഉണക്ക കറുത്ത മുന്തിരിയും കഴിക്കണം. പോഷണം കുറഞ്ഞവർക്ക് ഈത്തപ്പഴം നല്ലത്.ബദാം,കപ്പലണ്ടി വേകിച്ചത് ,ചെറുപയർ,കറുത്ത എള്ള്,വാൽനട്ട്,സൂര്യകാന്തി വിത്ത് തുടങ്ങിയവ കുറേശ്ശെ കഴിക്കണം.
നെയ്യ് ചേർത്ത ഭക്ഷണം കൊളസ്ട്രോൾ വരുമെന്ന് പേടിച്ച് കുട്ടിക്കാലം മുതൽ തന്നെ ഒഴിവാക്കുന്നവർ ഉണ്ട്‌.അത് തീരെ ശരിയല്ല.ഡാൽഡ,സൂര്യകാന്തി എണ്ണ എന്നിവയെക്കാൽ വെളിച്ചെണ്ണ തന്നെയാണ് നല്ലത്.എന്നാൽ പല തവണ പാകം ചെയ്ത് ഉപയോഗിക്കുന്ന ഒരു തരം എണ്ണയും നല്ലതല്ല.
കഫ സംബന്ധമായ രോഗമുള്ളവർക്ക് ഉഴുന്നിന്റെ ഉപയോഗം കുറച്ചുമതി. ആഴ്ചയിൽ മൂന്നു ദിവസമെങ്കിലും കടൽ വിഭവങ്ങൾ കഴിക്കണം. കറിവച്ച് കഴിക്കുന്നതാണ് നല്ലത്. ആവിയിൽ പുഴുങ്ങിയതും, അവൽ വിളയിച്ചതും, ഇലയട, നെയ്യിൽ വറുത്ത ഏത്തപ്പഴം,കരുപ്പട്ടി ചേർത്ത് വച്ച പായസം തുടങ്ങിയവ കുട്ടികളെ ശീലിപ്പിക്കണം. അധികം മധുരം, നിറം,മണം,രുചി എന്നിവക്ക് വേണ്ടി ചേർക്കുന്ന കൃത്രിമ വസ്തുക്കൾ,അധികമായ എരിവും പുളിയുംഎന്നിവ പരമാവധി ശീലിക്കാതെ നോക്കണം.
സവാളയെക്കാൾ ചുവന്നുള്ളി നല്ലത്.പച്ച മുളകാണ് ചുവന്ന മുളകിനേക്കാൾ നന്ന്.പിണം പുളിയാണ് സാധാരണ പുളിയേക്കാൾ ആരോഗ്യകരം.ഇഞ്ചിയും നാരങ്ങയും പല തരത്തിൽ ഉപയോഗിക്കാം.കൊളസ്ട്രോളും പൊണ്ണത്തടിയും കൂടുന്നത് സമയത്ത് ആഹാരം കഴിക്കാത്തത് കൊണ്ടാണ്.ചായയും കാപ്പിയും കുറയ്ക്കണം.ചുവന്ന ചീര ,മറ്റ് ഇല വർഗ്ഗങ്ങൾ എന്നിവ നല്ലത്.പാകം ചെയ്യാതെ ഉപയോഗിക്കാൻ സാധിക്കുന്നവ അപ്രകാരം ഉപയോഗിക്കണം.പച്ചക്കായ,പടവലം,കോവക്ക,പാവൽ,തുടങ്ങിയവ നല്ലപോലെ ഉപയോഗിക്കണം.