ന്യൂഡൽഹി: മിസോറാം ഗവർണറായി അഡ്വ. പി.എസ് ശ്രീധരൻപിള്ള സത്യപ്രതിജ്ഞ ചെയ്‌തു. ഐസോളിലെ രാജ് ഭവനിൽ ഗുവാഹത്തി ചീഫ് ജസ്റ്റിസ് അരുപ് കുമാർ ഗോസ്വാമിയാണ് സത്യവാചകം ചൊല്ലിക്കൊടുത്തത്. മിസോറാം മുഖ്യമന്ത്രി, മറ്റു മന്ത്രിമാർ എന്നിവർ ചടങ്ങിൽ പങ്കെടുത്തു.

ശ്രീധരൻ പിള്ളയുടെ കുടുംബാംഗങ്ങളോടൊപ്പം ബി.ജെ.പി ദേശീയ സെക്രട്ടറി സത്യകുമാർ, കേരളത്തിൽ നിന്ന് നാലു ക്രിസ്ത്യൻ സഭാ ബിഷപ്പുമാർ, കൊച്ചി ബാർ കൗൺസിൽ പ്രതിനിധികൾ എന്നിവരും സത്യപ്രതിജ്ഞാ ചടങ്ങ് വീക്ഷിക്കാനെത്തി. ബി.ജെ.പി നേതാക്കളായ അൽഫോൺസ് കണ്ണന്താനം, എം.ടി രമേശ്‌ എന്നിവരും ചടങ്ങിൽ പങ്കെടുത്തു.

ഇന്നലെ മിസോറാമിലെത്തിയ ശ്രീധരൻപിള്ളയെ ഗാർഡ് ഓഫ് ഓണർ നൽകിയാണ് രാജ്ഭവൻ സ്വീകരിച്ചത്. വക്കം പുരുഷോത്തമനും കുമ്മനം രാജശേഖരനും ശേഷം കേരളത്തിൽ നിന്ന് മിസോറാം ഗവർണർ ആകുന്ന മൂന്നാമത്തെ മലയാളിയാണ് പി.എസ് ശ്രീധരൻ പിള്ള.