തിരുവല്ല: 20കാരിയെ പീഡിപ്പിച്ച ശേഷം മൊബൈൽ ഫോണിൽ നഗ്നചിത്രങ്ങളെടുത്ത് ഭീഷണിപ്പെടുത്തി പണം തട്ടാൻ ശ്രമിച്ച കേസിൽ യുവാവ് അറസ്റ്റിലായി. പൂവച്ചൽ വീരണകാവ് വില്ലേജിൽ കുന്നാരി കരിക്കകത്ത് വിഷ്‌ണു ടി. രാജാണ് (25) തിരുവല്ല പൊലീസിന്റെ പിടിയിലായത്. ഫേസ്ബുക്കിലൂടെ പരിചയപ്പെട്ട തിരുവല്ല സ്വദേശിയായ യുവതിയെയാണ് ഇയാൾ പീഡിപ്പിച്ചത്. കഴിഞ്ഞ മാസം 22ന് കോട്ടയം റെയിൽവേ സ്റ്റേഷന് സമീപത്തെ ലോഡ്‌ജിലായിരുന്നു സംഭവം. പീഡനദൃശ്യങ്ങൾ സമൂഹമാദ്ധ്യമങ്ങളിലൂടെ പ്രചരിപ്പിക്കുമെന്ന് ഭീഷണിപ്പെടുത്തി പണം തട്ടാൻ ശ്രമിച്ചതിനെ തുടർന്ന് യുവതി പൊലീസിൽ പരാതി നൽകുകയായിരുന്നു. പൊലീസിന്റെ നിർദ്ദേശാനുസരണം പെൺകുട്ടി യുവാവിനെ തിരുവല്ല റെയിൽവേ സ്റ്റേഷനിലേക്ക് ഇന്നലെ ഉച്ചയോടെ വിളിച്ചുവരുത്തുകയും പൊലീസ് സംഘം കസ്റ്റഡിയിലെടുക്കുകയുമായിരുന്നു. പൊതുമേഖലാ ബാങ്കിലെ ജീവനക്കാരനാണ് വിഷ്ണു. പ്രതിയെ റിമാൻഡ് ചെയ്‌തു.